Maica Larriba pon a Flores Toxal como exemplo do apoio do Goberno ás empresas para mellorar a eficiencia enerxética e favorecer a transición ecolóxica

A subdelegada do Goberno en Pontevedra, Maica Larriba, visitou esta mañá os invernadoiros de Flores Toxal en Salcidos (A Guarda) para coñecer de primeira man o proxecto de produción de enerxía xeotérmica financiado polo Instituto para a Diversificación e Aforro da Enerxía (IDAE) por un importe de 176.000 euros. 

O novo sistema de enerxía xeotérmica, que pretende reducir os altos custos derivados do sistema de calefacción do invernadoiro, enmárcase nas liñas de axuda para a produción de enerxía térmica e xeración de enerxía eléctrica do Ministerio para a Transición Ecolóxica e o Reto Demográfico.

Tal e como salientou a subdelegada “estas dúas convocatorias financiaron na provincia 8 proxectos innovadores de xeración de enerxías renovables por un importe de 3,9 millóns de euros”.

Maica Larriba destacou que “estas novas instalacións de fontes renovables non só contribúen a reducir a emisión de gases contaminantes e a dependencia enerxética, senón que axudan a manter a actividade industrial e o emprego na provincia, sendo ademais un magnífico exemplo da colaboración público-privada que promove o Plan de Recuperación do Goberno”.

Flores Toxal, un exemplo da importancia do sector floricultor na provincia

Durante a súa visita, a subdelegada, que estivo acompañada do alcalde de A Guarda, Antonio Lomba. e os responsables da empresa Serafín Domínguez e Alfonso Álvarez, quixo tamén salientar a importancia da floricultura na provincia. “Son moitas as empresas que, como Flores Toxal, levan os seus produtos alén das nosas fronteiras, exportando e importando flores e plantas desde o Baixo Miño”. 

Neste sentido, Maica Larriba destacou que segundo os datos proporcionados polo Posto de Control Fronteirizo de Vigo, durante o 2021 exportáronse máis de 390.883 quilos de flores e plantas ornamentais, sendo Reino Unido e Brasil os principais destinatarios das exportacións realizadas desde o porto vigués. En canto ás importacións, no 2021 as empresas da provincia importaron máis de 51.889 quilos de plantas e flores desde Colombia, Ecuador ou Costa Rica.

A subdelegada explicou que a pesar de que a meirande parte deste tipo de operacións neste sector faise por vía aérea debido a fraxilidade e tempos de vida do produto, “os tráficos marítimos rexistrados evidencian o peso dun sector relevante para a economía da nosa provincia”.