O alcalde da Guarda recolle as bandeiras azuis das praias de Area Grande e o Muíño

Ata alí desprazáronse alcaldes e responsables de tódolos concellos recoñecidos pola Asociación de Educación Ambiental e do Consumidor (ADEAC) coas bandeiras azuis e sendeiros azuis para recoller tales distincións.

Ao acto asistiron o presidente da ADEAC, José Ramón Sánchez Moro, a Conselleira de Medio Ambiente, Beatriz Mato e o Presidente da Xunta de Galicia, Alberto Núñez Feijóo. O alcalde de Oleiros, Ángel García Seoane, actuou de anfitrión nunha xornada adicada a recoñecer os esforzos dos concellos galegos que puxeron a Galicia á cabeza das comunidades con máis bandeiras azuis, cun total de 141 distincións. Destas. 123 foron outorgadas a praias de 38 concellos da nosa xeografía e 18 a portos deportivos. Ademais, a estas súmanselle 21 distincións de sendeiros azuis, 12 centros azuis e dous recoñecementos especiais ás únicas praias que levan acadando a bandeira azul 30 anos consecutivos, a de Bastiagueiro, anfitrioa este pasado mércores e a de Miño, no concello do mesmo nome.

Pola súa parte o Concello da Guarda foi distinguido con dúas bandeiras polas praias de Area Grande e O Muíño e co sendeiro azul, de 5,6 quilómetros, que une ambos areais.

Os criterios esixidos para a obtención de bandeiras azuis están relacionados coa calidade das augas, que ten que ser excelente; a seguridade, a completa dotación de servizos, a accesibilidade, a atinada xestión ambiental e a sostibilidade dos areais e das dársenas.

Á vez que se produce isto, o Concello da Guarda está traballando na contratación de socorristas e na limpeza e adecuación dos areais da vila para telos en perfecto estado cara o inminente comezo do verán.