O BNG denuncia o desleixo da alcaldesa coa sanidade de Oia

O xoves 29  celebrouse pleno no concello de Oia. Presentamos dúas Mocións sobre “a nova tarifa eléctrica” e Moción sobre “a situación de deterioro na atención primaria de Oia. Restabelecemento inmediato dunha atención digna para Oia.”

A señora alcaldesa coa complicidade do seu equipo de goberno non admitiron que se votaran. Aínda así no BNG solicitamos que entraran pola vía de urxencia onde foron expostas ante o pleno; novamente o pp rexeitou que se votaran.

Ante esta negativa foron advertidos que serán responsables xunto coa xerencia da área sanitaria de calquera incidencia que poida padecer un usuario/a no centro de saúde debido á situación de desleixo no que se atopa ante a pasividade da Xunta.

Votaron en contra de debater e acordar o seguinte:

“Instar á Xunta de Galiza a garantir unha atención sanitaria digna no concello de Oia, cubrindo a totalidade das ausencias dos profesionais sanitarios, reforzando enfermaría e psx e dotando ao centro de saúde dun servizo de pediatría a xornada completa e unha enfermeira pediátrica."

A parvada da concellería da “felicidade” dous anos despois poderiámola trocar pola do engano, pero un engano que pódelle saír moi caro á nosa saúde. O xerente da área sanitaria de Vigo Javier Puente e a alcaldesa de Oia Cristina Correa seica mantiveron unha xuntanza afirmando que no noso centro o problema que hai é unha situación puntual e conxuntural.

Pois no BNG dicímoslle que non lle falten ao respecto aos veciños/as de Oia, propoñémoslle que melloren as condicións laborais dos profesionais que están sometidos a cargas de traballo e presión inadmisibles, instámolos a que non sigan coas políticas de precariedade laboral, cos recortes na sanidade pública en beneficio da privada, que non mintan á veciñanza.

Poden comezar por recuperar a todos aqueles profesionais que tiveron que marchar (nós dicimos botaron) para Portugal, Reino Unido, Alemaña e outros países de Europa na busca de mellores condicións laborais. Non xoguen coa saúde da xente.

Señora Correa, a felicidade das persoas comeza por unha boa saúde, as babecadas  están moi ben para andar de esmorga.

Oia merece uns servizos dignos. Sen saúde non hai felicidade.