O BNG esixe medidas diante do colapso da Atención Primaria

No pleno que se celebrará o próximo venres 28, o BNG presenta unha moción para esixirlle a Xunta de Galiza  que cambie  o actual modelo fracasado de Atención Primaria.

Os nacionalistas afirman que para levar adiante ese cambio é necesario aumentar o orzamento e  realizar no prazo máximo de seis meses un Plan de Ordenación de Recursos Humanos  que permita coñecer a situación real do cadro de persoal e establecer, as ratios axeitadas para ofrecer unha calidade asistencial digna, rematando coa precariedade na contratación de persoal, e convocando  a totalidade das prazas vacantes.

O portavoz do BNG Anxo Baz manifestou “é precisa unha auténtica aposta pola Atención Primaria para sacala do colapso no que se atopa. Os orzamentos para 2022 aínda son 2 millóns de € máis baixos que no ano 2021e 47 millóns de euros menos que no 2009. De aplicarlle o IPC, serían máis de 277 millóns de euros menos”.

Anxo Baz acabou concluíndo “Se falla a Atención Primaria, o fallo esténdese a todo o sistema. A este ritmo de deterioro estamos a un paso do colapso xeneralizado. A necesidade de fortalecemento da  Atención Primaria non permite máis demoras. Teñen que deixar de botar balóns fóra,  exercer de Goberno e tomar medidas. Os recortes   aplicados polo PP  na Xunta de Galiza están deixando a miles de persoas con unha atención sanitaria  moi deficitaria”