O BNG lamenta a falta de proxecto para a Praza de Abastos da Guarda

No mes de maio do 2020 o BNG  levou   ao pleno do Concello da Guarda  a proposta de  elaboración dun proxecto de reforma integral da Praza que nos permitira optar ao  recoñecemento de mercado de excelencia  por parte da Xunta de Galiza .  A nosa proposta foi aprobada.

Meses despois o grupo de goberno do PSOE, facendo caso omiso  do acordo plenario, anunciou a reforma do pavimento da parte superior, un acceso a terraza e a mellora dun posto por un importe total de 40.000 €. Nese momento o BNG  cualificou este anuncio como un  remendo máis que desvirtuaba radicalmente o acordo plenario comprometendo un proxecto  de futuro para a Praza.

A falta de criterio e a improvisación  chegan ao extremo de que o  acceso a terraza  presenta  barreiras arquitectónicas.

Desde o ano 2013 os parcheos realizados na Praza de Abastos superan os 332.000€. O grupo de goberno do PSOE nunha  recente comparecencia  nos medios de comunicación volven  anunciar  unha nova reforma “estética” por valor de 100.000 €.

Sen dúbida con estas inversións racionalizadas, cun proxecto ben definido, que simplemente non existe, a Praza podería dar un salto cualitativo. Cunha cuantía non moi superior Tomiño logrou un mercado de excelencia  e o Rosal cunha inversión bastante menor   vai camiño del.

O portavoz municipal do BNG Anxo Baz manifestou” a ausencia de proxecto do goberno municipal lévaos  a ir  dilapidando recursos, facendo remendo sobre remendo,  sen un proxecto global para camiñar cara a  un mercado de excelencia. As consecuencias están a vista, lonxe de dinamizar a praza en vez de abrirse postos pecháronse varios”.