O Círculo Podemos Tomiño pídelle ao Goberno Local que impulse puntos violeta no municipio

Valentina Valderrey Nogueira: “Acabar coas violencias machistas require do compromiso de toda a sociedade, por iso é importante involucrar á veciñanza como parte da solución”.

O Círculo Podemos Tomiño vén de presentar un requirimento para que o Goberno Local impulse a creación de ‘puntos violeta’ no municipio. Esta medida vén estipulada no ‘Plan de Mellora e Modernización contra a Violencia de Xénero’ do Ministerio de Igualdade.

“Acabar coas violencias machistas require do compromiso de toda a sociedade, por iso é importante involucrar á veciñanza como parte da solución”, indica a enlace de feminismos municipal de Podemos Valentina Valderrey Nogueira “aplaudimos esta medida do Ministerio de Igualdade porque vai nese senso e pedímoslle ao Concello que se comprometa a levala a cabo”.

‘Punto Violeta’ consta de tres puntos principais. Por unha banda, busca implicar a toda a sociedade na loita contra as violencias machistas. Por outro quere achegar a información dos servizos integrais ás vítimas a través da súa contorna. Finalmente, ten como obxectivo facilitar información sobre como actuar ante un caso de violencia machista a establecementos, entidades, empresas, organismos públicos.

Indica Valentina Valderrey Nogueira que “moitas veces unha muller en situación de violencia non sabe onde acudir. Cos puntos violetas esténdese a protección de estas mulleres á súa vida cotiá, o que facilita que se poidan informarse e sentirse arroupadas de maneira máis inmediata”.  Ademais, a formación considera que este tipo de iniciativas facilitan a concienciación da veciñanza respecto a unha cuestión de extrema gravidade como son as violencias machistas ao sentirse tamén como parte da solución.