O Colexio Oficial de Biólogos de Galicia organiza unha limpexa de lixo mariño na praia de Camposancos na Guarda

O Colexio Oficial de Biólogos de Galicia levará a cabo o próximo mércores 21 de setembro, e coa colaboración do concello de A Guarda, unha nova limpeza de lixo mariño no marco de “Stop and help!, que o lixo non chegue ao mar”, un proxecto enmarcado dentro do programa O teu Xacobeo da Xunta de Galicia, cuxo principal obxectivo consiste en fomentar a conservación do patrimonio natural do Camiño de Santiago.

Nesta ocasión o lugar elixido é a praia de Camposancos, onde están convocadas as persoas voluntarias participantes a partir das 10:30h da mañá, peregrinas e peregrinos que realizan o Camiño Portugués da Costa, representantes do tecido asociativo, e diversas entidades do terceiro sector como ANABAM, Asociación de Saúde Mental Avelaíña, Consello Climático Xuvenil de A Guarda, Cruz Roja Baixo Miño, Asociación San Xedrome Emiliani.

Todas estas xornadas de limpeza de lixo mariño que organiza o COBGA en diferentes areais de varios dos concellos atravesados polo Camiño Portugués da Costa, culminarán a finais do mes de outubro coa realización dunha intervención artística final dirixida por Carme Hermo e Antón Sobral na que empregarán diferentes refugallos colectados nas limpezas e que será exposta en Vigo, no Centro de Visitantes do Parque Nacional Marítimo-Terrestre das Illas Atlánticas de Galicia, coa finalidade de servir de memoria viva na loita contra os lixos mariños e as súas consecuencias sobre o medio ambiente.