O Concello de Tomiño propón catro andainas para conectar coa memoria local e o territorio

O Concello de Tomiño aposta por recuperar a conexión co territorio e co pasado local a través do ciclo de rutas guiadas ‘As pegadas do pasado e do presente’, unha iniciativa cultural aberta á participación cidadá que busca poñer en valor o patrimonio histórico e social das parroquias tomiñesas.

Conducidas pola historiadora Natalia Jorge, estas catro andainas gratuítas permitirán descubrir elementos e relatos que forman parte da identidade da vila, moitas veces invisibles aos ollos da vida cotiá. A primeira ruta terá lugar o sábado 5 de xullo ás 10.00 horas en Amorín, cun percorrido titulado ‘Sabías que... o río Miño era atravesado a cotiá polas persoas dunha e doutra marxe?’. O punto de encontro será o embarcadoiro da parroquia.

A alcaldesa de Tomiño, Sandra González, destaca que “nun mundo cada vez máis globalizado, é máis necesario ca nunca reencontrarnos co que nos fai comunidade e afondar nos lazos que nos unen. Coñecer as pegadas do noso pasado é tamén un xeito de construír o futuro con orgullo e identidade”.

As rutas desenvolveranse entre xullo e agosto, sempre entre as 10.00h e as 12.00h, e non requiren inscrición previa. Están deseñadas para todas as idades e con paradas nos principais puntos de interese histórico, natural e cultural de cada parroquia.

O calendario completo do ciclo é o seguinte:

• 5 de xullo: Amorín

• 19 de xullo: Santa María de Tebra e Pinzás

• 9 de agosto: Tomiño e Estás

• 23 de agosto: Goián

Con esta proposta, o Concello busca fomentar a participación cidadá, a conciencia histórica e a identidade local. “Queremos que veciños e veciñas redescubran as historias que agochan as nosas rúas, montes e ríos”, conclúe González, “e reforzar o orgullo de pertencer a unha terra chea de vida e memoria”.

Toda a información detallada das rutas está dispoñible na páxina web oficial do Concello de Tomiño.