O Concello do Rosal e o UD Ribera acordan a reforma do campo de fútbol da Mata ao abeiro do programa -A veciñanza conta-

Ao abeiro do programa ‘A veciñanza conta’, a alcaldesa do Rosal e a directiva da UD Ribera mantiveron estes días un encontro no que abordaron proxectos de presente e de futuro do club, como a reforma do campo de fútbol da Mata “para convertelo nunhas instalacións plenamente inclusivas a medio prazo. Somos un concello comprometido que busca facer do municipio un lugar accesible para todos e todas, tamén no eido deportivo”, salienta a rexedora, Ánxela Fernández Callís.

Durante a reunión, a alcaldesa e o UD Ribera trataron principalmente a primeira fase do proxecto para crear un campo de fútbol accesible, que comezará nos vindeiros días coa licitación das obras de reforma integral dos vestiarios. Concello e club tamén comezarán a traballar no proxecto de cambio do céspede do campo, unha necesidade detectada pola entidade deportiva e para a que o concello buscará "non soamente financiamento, senón tamén levalo adiante de xeito planificado para minimizar o efecto na actividade deportiva que se leva a cabo nel”.  

A reforma dos vestiario incluirá a mellora da accesibilidade aos sete vestiarios independentes cunha nova distribución e xerando novos espazos accesibles tanto para o persoal técnico como para as e os xogadores. Así, aumentarase o número de duchas dispoñibles con cabinas accesibles, ampliarase a porta de acceso a estas instalacións ou colocaranse portas corredoiras para comunicar os vestiarios 1-2 e 3-4 e poder dispoñer así dun espazo único con dobre capacidade. 

Durante o encontro a alcaldesa quixo poñer en valor o gran traballo que está a desenvolver a UD Ribera, “cunha clara aposta pola canteira e cunha reactivación exemplar tras a crise sanitaria". A alcalde indicou que "é un orgullo contar con entidades como este club, un dos poucos que durante a pandemia soubo adaptarse para manter a actividade deportiva entre nenos e nenas, algo tan importante para a saúde xeral, especialmente nun momento tan delicado”.