O Concello do Rosal promove un proxecto piloto para crear iniciativas de inclusión entre persoas de diversas capacidades

O Concello do Rosal, no seu firme compromiso coa inclusión, vén de poñer en marcha ‘Cocreando Sociedade’, un proxecto piloto participativo e transversal no que diferentes persoas, representantes de colectivos do tecido asociativo, da administración local e de entidades que traballan a prol da diversidade estreitarán lazos e codeseñarán iniciativas para poñer en práctica en vindeiras datas. Tras unha fase previa de investigación e coñecemento da realidade rosaleira, esta semana celebrouse o primeiro encontro presencial de traballo desta iniciativa que ten por obxectivo “xerar unha contorna máis inclusiva e democrática”, salienta a alcaldesa do Rosal, Ánxela Fernández Callís.

A través deste proxecto o Concello reúne a diferentes axentes chave no territorio co fin de ter unha mirada máis ampla que teña en consideración diversas capacidades. As entidades con escola implicadas neste proceso participativo son a Agrupación Musical do Rosal, a Sociedade Deportiva Atlético Novás, a Unión Deportiva Ribeira, o Club Ciclista do Rosal, a escola infantil Galiña Azul do Rosal, o CRA María Zambrano, o CPI Manuel Suárez Marquier e as asociacións San Xerome e Avelaíña, así como o propio Goberno municipal, representado pola rexedora e o concelleiro de Participación Veciñal, Ramón Fernández Leal.

Durante as primeiras xornadas de traballo, celebradas os pasados 28 e 29 de xuño, as persoas representantes das entidades tiveron a oportunidade de afondar no coñecemento de cada unha delas e compartir a súa relación coa discapacidade e a enfermidade mental.

A través de metodoloxías participativas xerouse un mapa de recursos compartidos, detectáronse necesidades das entidades e do propio territorio en relación á inclusión e, finalmente, codeseñáronse varias accións colaborativas para levar a cabo nos vindeiros meses.

O proxecto continuará na esfera dixital cunhas sesións de mentorización para axudar ás entidades a concretar o plan de acción. Unha vez completadas celebrarase outra sesión participativa de avaliación das experiencias e formularanse novas ideas para ser desenvolvidas nun plan de acción a tres anos vista co obxectivo de asegurar a visión inclusiva e achegar a todas as persoas a posibilidade de participar nunha sociedade máis diversa.

Ademais de para crear ese plan de acción conxunto, ‘Cocreando Sociedade’ nace cos obxectivos fundamentais de “aumentar a participación das persoas con diversidade funcional nas actividades cotiás do tecido asociativo, xerar sinerxías entre todas as entidades implicadas, contar coas propias persoas con diversidade funcional no deseño de actividades e poñer en valor o gran tecido asociativo que temos no Rosal”.