O Concello renova o saneamento da rúa Costa do Paleón en Pías

O Concello do Rosal acaba de renovar o saneamento da rúa Costa do Paleón en Pías. A instalación existente era das primeiras do municipio e, segundo explica o concelleiro de Vías e Obras, Germán Fernández, estaba “moi deteriorada”. “Era de cemento e tiña varias filtracións que provocaban a aparición de baches na vía”, situación que facía a intervención “moi necesaria”, explica. Ademais, o sistema non estaba conectado directamente á rede de saneamento que vai ata A Guarda e requería un bombeo extra para ser transportada ata a EDAR. Coa nova instalación subsanouse este problema facendo un enlace directo que “reduce o custo enerxético para O Rosal”.

Na intervención o Concello renovou a instalación por tuberías de PVC, e conectou todas as vivendas novas á rede. Tamén se acondicionou a vía cunha capa de asfalto provisional que será reforzada nun mes cunha nova intervención que dará por finalizadas as obras. O concelleiro explica que a mellora do sistema de saneamento da rúa de Paleón está dentro do plan da administración local para “renovar e mellorar as partes máis antigas da rede de saneamento do Rosal”.