O estudantado da Guarda visita á Confraría de Pescadores e á Asociación de Redeiras do Baixo Miño -Atalaia-

Despois do comezo, neste 2022, das actuacións de formación nos centros de ensino, o programa RELEVO 2 xa ten en marcha sesións de aula nas que interveñen representantes de entidades de cada un dos sectores que se abordan no programa de contidos (Pesca e Acuicultura, Transformación e Comercialización e Turismo e Deportes Náuticos).

O obxectivo é dar a coñecer esas empresas e achegar ao alumnado o mundo laboral en relación ao sector do mar; titulacións académicas, centros onde cursalas e posibles saídas profesionais. A iniciativa tamén contempla a realización de visitas nas que sexa o alumnado quen vaia coñecer de primeira man as instalación dalgunha desas entidades colaboradoras.

No marco deste programa de visitas, esta mañá o alumnado de 4º da ESO do CPR San José – Hermanas Carmelitas de A Guarda visitou ás instalacións da lonxa da súa localidade para coñecer o seu funcionamento e o primeiro punto de venta dos produtos do mar que se comercializan a nivel local. A rapazada puido coñecer como é o día a día dos e das profesionais do mar da man da Confraría de Pescadores Santa Trega da Guarda e da asociación de redeiras do Baixo Miño ‘Atalaia’. Contaron tamén coa visita dos gardacostas.

O alumnado estivo acompañado pola equipa docente do centro, persoal da asistencia técnica de RELEVO 2 e a xerente do GALP Ría de Vigo – A Guarda, Elena Herbello.

No territorio do GALP Ría de Vigo – A Guarda participan un total de 13 centros de ensino de secundaria e de aquí a final de curso están previstas máis saídas do alumnado a outras instalación e tamén sesións de aula con profesionais do sector.