O goberno do PP e Fariñas votan en contra da senda peonil entre A Guarda e Camposancos

No pleno celebrado no día de onte o PP de Carrero e o seu socio Fariñas votaron en contra da proposta do BNG de esixir á Xunta de Galiza a realización da senda entre Camposancos e A Guarda.

O portavoz do BNG, Anxo Baz,  na súa intervención diante da corporación municipal recordou que as repetidas promesas do PP desde o ano 2017 non se concretaron en nada e aseverou “non imos ser tan incautos como para empezar a  crelas agora. Non estamos dispostos a que pase coa senda entre Camposancos e A Guarda o mesmo que pasa co vial entre A Guarda e Tui. Máis de 20 anos de promesas e o vial non dá pasado de Goián”.

O nacionalista afeoulle a actuación ao  goberno municipal neste asunto e fixo fincapé en que a verdadeira intención do goberno do PP e Fariñas xa se puxera  de manifesto no momento en que renunciaron aos  fondos que había para a construción da senda peonil A Guarda- Camposancos no plan de  sostibilidade turística,  que  como mínimo, serviría para iniciar a obra e que  foron desviados a outros cometidos.

O voto en contra do PP e de Fariñas -concluíu o nacionalista-  debe alertarnos  de que corremos o  perigo de quedarnos sen senda si  non pelexamos por ela con convicción, por iso desde o BNG imos seguir   defendéndoa da  man da sociedade  na rúa e  nas institucións,   para  que non  quede nunha  promesa incumprida unha vez máis.