O grupo municipal socialista da Guarda reclama á Consellería de Educación da Xunta de Galicia que paralice a redución do persoal docente do IES A Sangriña

• A Xunta pretende unha redución de profesorado, pasando de 76 a 69 docentes. Hai que ter en conta que a Xunta xa reduciu no ano 2021 de 81 a 76 profesores.
• A Xunta de Galicia atenta contra a igualdade de oportunidades e contra os  dereitos básicos da cidadanía guardesa.

O Grupo Municipal Socialista presentou  no Rexistro Municipal  do concello da Guarda,  o pasado 1 de setembro, unha Moción  relativa á reclamación á Xunta de Galicia en relación á redución de persoal docente no IES A Sangriña.

O 17 de agosto  producíase unha reunión entre o Director do IES A Sangriña, a viceportavoz do Grupo Socialista no Parlamento de Galicia, a concelleira de educación  e o Alcalde da Guarda. Nesa reunión se trasladou a preocupación do equipo directivo da Sangriña pola importante redución de profesorado que a Consellería de Educación  aplicará no instituto, feito que levou á directiva a presentar a dimisión en bloque.

De todos é coñecido  que os núcleos rurais como A Guarda, que se atopan lonxe de núcleos urbanos nos que a oferta formativa é máis ampla, deben gozar dunha discriminación positiva  para posibilitar aos cidadáns  recibir unha formación de calidade na que non só se transmitan coñecementos senón que se atenda á diversidade e a vulnerabilidade.

A política educativa do Partido Popular atenta contra a igualdade de oportunidades e contra os dereitos básicos da cidadanía guardesa, na que a distancia e a falla de boas comunicacións dificulta aínda máis o acceso á educación.

Así o Grupo Municipal Socialista solicita nesta Moción unha declaración a favor da educación pública e  que a Consellería de Educación da Xunta de Galicia paralice de xeito inmediato as medidas de  xestión que implican  a redución do cadro de persoal docente do IES A Sangriña.