O II Trofeo Ciclista Aser Estévez pon o broche final ás Festas das Mercedes da Gándara

As Festas das Mercedes da Gándara chegan á súa recta final cun evento deportivo de gran atractivo: o II Trofeo Ciclista Aser Estévez, que terá lugar o sábado 27 de setembro.

A carreira desenvolverase nun circuito urbano de 1,1 km con saída e chegada na praza dos Xeixiños, percorrendo as rúas da Gándara. A competición reunirá a ciclistas de diferentes categorías procedentes de Galicia e Portugal, consolidando así esta proba como un referente dentro do calendario ciclista local.

As carreiras comezarán ás 14:30 horas e contarán coa participación de deportistas das categorías promesas, principiantes, alevíns, infantís, cadetes, féminas, júniors, másters (30, 40, 50 e 60), elite e sub-23.

Con motivo da celebración, o Concello da Guarda informa de que se aplicarán restricións de tráfico durante a tarde do sábado na estrada da Gándara, así como nas rúas Redondiña e Avenida de Francisco Lomba.

Esta segunda edición do trofeo ciclista súmase ao programa festivo das Mercedes, combinando deporte, tradición e convivencia veciñal para despedir unha das celebracións máis destacadas da parroquia da Gándara.