O pleno da Deputación aproba a transferencia ao Concello do Rosal dun tramo antigo de estrada provincial como viario urbano municipal

A través desta transferencia a Deputación de Pontevedra cede ao concello do Rosal un tramo antigo da vía que, polas súas características funcionais actuais e tamén de utilidade, é asimilable ao viario municipal de tipo urbano. De feito, na actualidade, a vía non forma parte do itinerario principal da estrada provincial e unicamente dá acceso aos predios colindantes, polo que mediante a cesión o concello poderá garantir de xeito óptimo o seu mantemento e control de ocupación do dominio público.

A transferencia desta parte antiga da vía provincial inclúese no convenio asinado entre a Deputación e o concello do Baixo Miño para a mellora dun tramo de aproximadamente 575 metros da estrada provincial EP3302. Mediante este convenio, cun orzamento de 142.655,01 euros e en execución na actualidade, estase a acondicionar a estrada cunha senda peonil, beiravía entre a senda e a calzada, pasos de peóns sobreelevados e redutores físicos de velocidade. Deste xeito, a actuación persegue as liñas de mobilidade que está a estender a Deputación de Pontevedra por toda a xeografía provincial, delimitando a circulación do tráfico rodado e peonil e impulsando a seguranza viaria, dispoñendo de espazos seguros para os colectivos máis vulnerables.