O PP de Tomiño esixe un plan integral de saneamento para dez zonas co apoio da Deputación

O Partido Popular de Tomiño solicitou a convocatoria dun pleno extraordinario para debater a necesidade dun plan integral de extensión do saneamento que chegue a dez áreas do municipio que, segundo denuncian, seguen sen acceso a unha rede básica de sumidoiros. O PP suxire empregar para este proxecto os 1,2 millóns de euros que achegará o Plan Provincia Extraordinaria da Deputación de Pontevedra, dos cales ata 900.000 euros serían cubertos polo organismo provincial.

A iniciativa do PP xorde tras o rexeitamento do BNG a incluír esta proposta no pleno ordinario máis recente, o que levou aos populares a solicitar esta sesión extraordinaria co fin de “corrixir a deixadez do Concello” en materia de saneamento e aproveitar esta oportunidade de financiamento para mellorar a calidade de vida de milleiros de veciños. Mónica Otero, voceira do PP local, sinala que zonas como Piñeiro, Amorín, Currás, Sobrada, Taborda, Barrantes, Pinzás, Carregal, Tebra e partes de Forcadela seguen sen contar con este servizo básico, sendo unha situación insostible para o ano 2024.

“É inaceptable que a maioría dos veciños sigan sen saneamento, un servizo básico de competencia municipal, especialmente cando hai fondos dispoñibles coa achega provincial, que representa unha oportunidade histórica para mellorar estas infraestruturas,” destacou Otero. A concelleira demanda que o BNG, á fronte do goberno municipal, “teña sensibilidade e acepte esta proposta razonable en lugar de investir en proxectos de alto custo e escasa utilidade para os cidadáns”.

Desde o PP aseguran que a súa proposta de saneamento cumpre cos requisitos esixidos pola Deputación para optar ao Plan Provincia Extraordinaria, argumentando que “permitirá mellorar a cobertura do saneamento, protexer o medio ambiente e reducir os problemas de salubridade pública, como as pragas de moscas estivais”.

O grupo popular conclúe que esta iniciativa fomenta a igualdade e o acceso equitativo aos servizos básicos no municipio, facendo un chamamento ao BNG para que “opte polo sentido común” e colabore nesta solicitude en beneficio de todos os veciños de Tomiño.