O profesorado exento de incorporarse o luns aos centros será substituído por docentes do propio centro ou por substitutos

Unha vez sometido a este Comité, o documento, cos posibles cambios acordados, será publicado para a súa aplicación no caso de que se confirme o paso en Galicia á Fase II do Plan de desescalada do Goberno central e se poidan retomar as clases presenciais a partir do 25 de maio para segundo curso de Bacharelato e dos ciclos Medio e Superior de Formación Profesional.

Exención e substitución
A Resolución analizada hoxe no Comité Intercentros de Seguridade e Saúde Laboral inclúe a descrición dos pasos que debe seguir o persoal que está nun grupo vulnerable de risco para resultar exento de retomar as clases presenciais o vindeiro luns. Neste sentido indícase que a solicitude debe ser tramitada a través do centro educativo, que lla fará chegar á Inspección Médica Educativa da Xefatura Territorial correspondente. Mentres se realiza a tramitación, a persoa solicitante non terá a obriga de acudir presencialmente ao centro, pero si de continuar a docencia telemática.

O documento inclúe tamén a dispensa de asistencia ao centro educativo para a actividade lectiva presencial para o persoal que teña ao seu cargo menores de 12 anos ou maiores dependentes. Esta solicitude tamén debe tramitarse a través do centro educativo.

Segundo indica o documento, de producirse ausencias polos devanditos motivos, a dirección do centro poderá solicitar a presencia de calquera profesor con destino nese centro para atender as necesidades do alumnado. Unha vez esgotadas as posibilidades de dar cobertura as necesidades de atención con profesorado do propio centro, poderá solicitar a designación dun substituto.

Así mesmo a resolución especifica que as clases presenciais poderán ser retransmitidas por medios telemáticos para o alumnado que non acode ao centro educativo, preferentemente en directo coas ferramentas subministradas pola consellería e informarase ao alumnado de que a mesma non pode ser divulgada. Así mesmo, deberá colocarse a cámara de tal forma que non sexa posible a identificación do alumnado presente na aula.

Necesidades de apoio
Outros cambios introducidos refírense ás normas específicas para o alumnado con necesidades de apoio educativo. Neste caso, establécese que os departamentos de Orientación, tendo en conta o informe médico, deberán determinar as condicións do alumnado con necesidades específicas de apoio educativo e a procedencia da aplicación das medidas e protocolos de atención establecidos pola Consellería de Sanidade.