O PSdeG de Tomiño rexeita desestimar a alegación do CSIF á aprobación inicial do orzamento municipal

O venres 20 de xaneiro, no Concello de Tomiño celebróuse pleno extraordinario urxente cun único punto na orde do día, desestimar a alegación do CSIF á aprobación inicial do orzamento xeral municipal para o ano 2023.

A organización sindical presentou reclamación á aprobación inicial do orzamento municipal baseada na falta de documentación na mesa xeral de negociación celebrada o pasado 23 de novembro de 2022. Ante a falta de documentos que lle impiden analizar a situación, solicitan a suspensión da mesa, ou alomenos que non se negocie o punto relativo ós capítulos 1 e 2, ambas rexeitadas pola presidencia da mesa que representa ó Concello. O CSIF denuncia que coa aprobación inicial do orzamento non se negociou ningunha das cuestións que afectan ás condicións laborais do persoal funcionario e laboral , polo que se incumpre o previsto no artigo 37 da Lei 7/2007 e manifestan que o Concello de Tomiño está a coartar o dereito á negociación efectiva e real.

As socialistas por coherencia, votaron en contra da desestimación da alegación, pois xa na sesión celebrada en decembro para a aprobación inicial do documento , decidiron abandoar o pleno polas prácticas pouco democráticas do goberno do BNG, e se preguntan de que vale presumir de ser os primeiros en levar o orzamento xeral ao pleno en tempo e forma? Queda constatado que a forma non foi a correcta e agora temos o principal documento económico en suspenso pola nula transparencia e capacidade de negociación do goberno nacionalista.

Violeta de Santiago, voceira do PSdeG- PSOE, manifesta que votar a favor desta desestimación sería votar a favor de non cumprir a lei, e lembra que durante todo este mandato " estamos lamentando a falta de democracia e transparencia deste goberno. A opacidade e as irregularidades chegan ata o punto de conculcar os dereitos fundamentais dos e das traballadoras , algo que non se pode consentir nin aceptar dun goberno que se supón é de esquerdas.