O Rosal celebra un fin de semana de cultura con música e teatro no Auditorio Municipal

O Auditorio Municipal do Rosal converterase esta fin de semana no epicentro da cultura local cunha programación que combina música e teatro para todos os públicos. O Concello presenta dous eventos destacados que poñen en valor o talento, a tradición e o compromiso cultural da vila: o Concerto de Outono da Coral da Agrupación Musical do Rosal (AMDOR) e a representación teatral ‘Retrincos de Castelao’.

O primeiro gran evento terá lugar o sábado 25 de outubro ás 20:00 horas, cando a Coral da AMDOR celebre o seu Concerto de Outono con motivo do seu 21º aniversario.
O público poderá desfrutar dunha cita musical de alto nivel que contará coa participación da Coral Polifónica de Campo Lameiro e da Coral Airiños da Capela (A Coruña), ademais da agrupación anfitrioa.
A entrada será libre ata completar aforo, e a organización anuncia unha sorpresa especial para o público asistente, como colofón dun evento que pretende ser unha festa da música e da amizade entre coros.

A programación cultural continuará o domingo 26 de outubro ás 19:00 horas coa posta en escena da obra ‘Retrincos de Castelao’, protagonizada por Fran Rei e Isabel Risco, baixo a dirección de Diego Rey.
Esta adaptación teatral ofrece un percorrido humorístico e emotivo pola Galicia que inspirou ao xenial Alfonso Daniel Rodríguez Castelao, a través dun formato dinámico e accesible que mestura teatro, humor e memoria.
A proposta convida o público a reflexionar, rir e conectar coa identidade galega a través das historias e personaxes do autor de Rianxo.

A alcaldesa do Rosal, Ánxela Fernández Callís, destacou que “estes dous días de cultura demostran o compromiso do Concello coa promoción artística e o acceso a actividades de calidade para toda a veciñanza”. Engadiu que “a música e o teatro son ferramentas de encontro, aprendizaxe e diversión que enriquecen a vida da nosa comunidade e fortalecen o tecido cultural local”.

Con esta programación, o Concello do Rosal reafirma o seu apoio ás iniciativas culturais que fomentan a participación cidadá e promoven o acceso á arte e á creación, consolidando o Auditorio Municipal como un espazo de referencia para a vida cultural do Baixo Miño.