O Rosal inicia a ampliación do mercado municipal, financiada co plan concellos

Acadar un espazo vivo e con futuro para dinamizar O Rosal económica e socialmente. Este é o obxectivo co que o Concello do Rosal aborda as obras de remodelación do Mercado Municipal, que acaban de entrar na súa segunda fase. A deputada Iria Lamas, o deputado Gregorio Agís e a alcaldesa Ánxela Fernández visitaron hoxe o espazo onde xa se iniciaron as obras para ampliar o Mercado cun novo edificio anexo ao actual, que albergará unha zona de degustación, con área de restauración e espazos para exposicións, reunións e cursos. Os traballos serán financiados a través do Plan Concellos cun total de 389.890€ e únense tamén ás obras de remodelación da praza do Calvario onde se sitúa o Mercado, que se financiarán ao abeiro do Plan ReacPon da Deputación.

O novo volume conectará co edificio actual do Mercado, que data de 1954 e fora reformado interiormente xa o ano pasado tamén cunha achega do Plan Concellos, e adecuarase á morfoloxía do inmoble xa existente co fin de acadar unha imaxe propia unificada do proxecto, aínda que cunha linguaxe construtiva  moderna, baseada na reinterpretación do estilo industrial comunmente empregada nos invernadoiros de principios do século XX. O aceiro, a madeira e azulexo combinaranse nas diferentes estancias e buscarán dar calidez ao espazo como nexo común entre novo e vello.

Máis polo miúdo, o edificio, de dúas alturas, acollerá na planta baixa a zona do local, de consumo e mostras. Así, contará nesta estancia cun espazo de emprendemento e posto de comida para poñer en valor os produtos da horta da contorna, un local que amais será referencia e punto de encontro, espazo de cursos e degustacións gastronómicas e zona de exposición e lecer. Doutra banda, a planta alta contará cunha sala de lecer e usos múltiples pensada para a mostra de exposicións municipais. Inclúe na zona posterior, unha nova terraza xardín na que a horta estará presente aportando carácter unificador co conxunto. Os patios das dúas plantas confórmanse como elementos que iluminan, ventilan e caracterizan os espazos e serán visibles e accesibles desde as zonas públicas do local.

Con este proxecto o Concello busca tamén poñer en valor a horta do Rosal como elemento característico e imaxe recoñecible do conxunto. Prevese deste xeito introducir numerosos elementos de cultivo, tanto en maceta interior como nos accesos e nos patios exteriores, creando un fío condutor común que axude a integrar ambos espazos.

Plan ReacPon

Esta reforma integral do Mercado serve de antesala á remodelación da praza do Calvario onde se sitúa e que a Deputación vai financiar tamén a través do Plan ReacPon, cuxo convenio xa foi asinado co Concello. O orzamento ascende a 1,5 millóns, dos que a institución provincial aportará 517.938€. De acordo a este proxecto, a praza transformarase por completo para converterse nun espazo amable para as persoas, ao tempo que pon en valor os elementos patrimoniais da contorna e xera espazos urbanos públicos de alta calidade para a veciñanza. Precisamente, na contorna do mercado habilitaranse espazos coa plantación de árbores de gran porte que recordarán ás sobreiras existentes principios do século XX. O proxecto contempla tamén a reordenación do tráfico na contorna, restrinxindo o paso dos vehículos por este punto neurálxico do Rosal.