O Rosal mellora a conexión entre a PO-353 e PO-354 cunha reforma integral do Camiño da Pousa

O Camiño da Estrada da Pousa xa luce unha nova imaxe tras a finalización das obras de mellora integral realizadas polo Concello do Rosal. Con esta actuación, a administración local dá un paso máis dentro do seu plan estratéxico para modernizar a rede viaria municipal, garantindo unha mobilidade máis segura, eficiente e sostible para a veciñanza.

Conectando dúas vías autonómicas principais —a PO-353 e a PO-354—, este camiño constitúe un eixo vertebrador da circulación interna do municipio. O alto nivel de deterioro que presentaba, derivado do uso constante e do paso do tempo, motivou a intervención do Goberno municipal, que optou por unha reforma completa máis alá do simple asfaltado.

O proxecto, cun investimento superior aos 51.000 euros financiados con fondos municipais e do Plan Marco de mellora de camiños municipais de Agader, incluíu o recrecido de pozos e rexas, a reparación do firme, a limpeza e o roce das marxes, así como melloras "invisibles" pero fundamentais como a renovación das tubaxes da traída municipal e a canalización de augas pluviais.

A rexedora do Rosal, Ánxela Fernández Callís, destacou que esta obra “forma parte dunha folla de ruta clara do Goberno municipal que aposta por camiños seguros, cómodos e ben conectados. Non queriamos quedarnos nun simple asfaltado, senón garantir a durabilidade e a calidade coidando tamén as infraestruturas subterráneas”.

A intervención tamén supuxo a posta en valor da contorna da Praza da Mareca, un espazo moi frecuentado pola veciñanza que agora mellora en accesibilidade, estética e integración coas novas infraestruturas da zona.

Pola súa parte, o concelleiro de Vías e Obras, Germán Fernández, asegurou que “esta intervención é un exemplo do tipo de obra que queremos impulsar: funcional, planificada e pensada para o futuro. Cada camiño no Rosal é unha peza clave no noso mapa de cohesión territorial”.

Con esta actuación, o Concello do Rosal consolida o seu compromiso cunha rede viaria moderna, segura e adaptada ás necesidades reais da cidadanía.