O Rosal recupera o -Festival Xente Xida-, unha cita coa música tradicional

O Concello do Rosal e a Asociación Cultural Xida recuperan o encontro social despois de máis de dous anos de crise sanitaria cunha nova edición do Festival Xente Xida, unha festa con raíces para todas as idades e públicos coa mellor música e gastronomía. Será a cuarta edición do festival, que se celebrará o vindeiro 24 de xullo a partir das 21.30 horas no colexio da Mata con acceso libre e de balde.

“O festival volve tras a pandemia coas mesmas orixes grazas ao traballo da asociación cultural Xida, conformado por un grupo de persoas moi implicadas socialmente que traballa a prol do folclore e da música e que colaboran co Concello na organización deste evento que forma parte das Festas do Verán do Pilar”, destacou a alcaldesa, Ánxela Fernández Callís, que agradeceu tamén o labor desempeñado pola asociación.

Polo escenario da cuarta edición deste festival pasarán "O Trebón dos Xidos", que amosará un anaco da súa música e da súa tradición; o grupo galego "Cantometrics" e os baioneses "Abóbriga", un grupo de gaiteiros que dende 2008 ofrecen unha mostra da música tradicional mesturada con composicións propias e cancións populares.

Ademais, a música tradicional estará mesturada coa gastronomía, xa que o público poderá gozar da cantina e do porco ao espeto.