O Rosal ultima a rehabilitación da Escola Unitaria de Pías

O Rosal continúa traballando para reforzar e modernizar a súa educación de proximidade. O Concello comprometeuse, cun investimento de 200.000 euros, á rehabilitación progresiva das súas escolas unitarias e os traballos na CRA de Pías avanzan con moi bos resultados. A alcaldesa, Ánxela Fernández, explica que esta reforma “vai marcar un antes e un despois no que é a rehabilitación de edificación municipais e de gran valor patrimonial do noso concello”, e engade tamén que é “unha clara mostra da nosa aposta polo aforro enerxético e pola educación de proximidade que ofertan as unidades rurais”.

A día de hoxe, a Escola de Pías xa conta cunha nova soleira que impermeabiliza o contacto co solo, tamén se colocou un trasdosado con illamento térmico en toda o cerramento en contacto co exterior e illouse o teito tanto por riba como por baixo. A finais de mes chegarán as novas fiestras e portas que van mellorar as existentes tanto térmica como acusticamente.

A alcaldesa tamén explica que se está a renovar toda a instalación eléctrica, fontanería e saneamento. Incorporouse a climatización por chan radiante para substituír os radiadores eléctricos que producían un alto consumo. E para garantir unha calidade de aire sen ter que ventilar manualmente instalouse xa un sistema de ventilación mecánico con recuperación de calor de alta eficiencia enerxética.

Nos seguintes meses executarase a renovación da carpintería interior, un novo chan confortable e limpo e un falso teito con prestación acústicas para reducir o ruído nas aulas. En definitiva, unha renovación integral da escola para mellorar o confort dos nenos e profesores cun mínimo consumo enerxético.

Pías será a primeira, pero para ao Concello “as seis escolas unitarias do Rosal son unha prioridade”, que permiten “fomentar unha educación de proximidade e responsabilidade coa nosa contorna entre os nenos e nenas”. Por todo isto, “queremos que sexan espazos modernos e sostibles”, conclúe Ánxela Fernández.