Oia son eu

Se remontamos na historia á época do absolutismo, cuxa figura principal en Francia foi Luís XIV que acuñou a famosa frase "Eu son o Estado", cuxa vontade era lei, e como lei, incuestionable xa que o seu poder chegou a el de Deus,  vemos que derrubar un réxime feudal non é tarefa doada. Afortunadamente, hoxe en día, no Estado de Dereito, están dispoñibles procedementos democráticos para derrubar aos gobernantes tentados a seguir este tipo de políticas absolutistas.

A pesar de todo, hai políticos aos que o réxime democrático non parece convencer e intenta por todos os medios ao seu alcance impedir o seu desenvolvemento, xa sexa aplicando políticas de montaña rusa cando a súa representación o permita, ben poñendo todo tipo de trabas á oposición para evitar o seu control e ter que dar explicacións cando as demanda. En definitiva, a súa política baséase na corrupción da democracia.

Oia é un claro exemplo de todo o dito anteriormente, as promesas feitas na toma de posesión da alcaldesa dicindo que gobernaría para todos quedaron só así, en promesas nunca cumpridas. No que vai de lexislatura, o principal partido da oposición (PSdeG-PSOE) presentou un total de catorce mocións para o seu debate nos plenos. De todas elas, só unha figuraba na orde do día, as mocións presentadas trataron temas de gran importancia para Oia (saneamento, Faro Silleiro, sanidade, estradas, etc). Por todo isto, viuse que solicitamos plenos extraordinarios para que se debatan todos estes temas. Como exemplo significativo, a información que se solicitou sobre a titularidade do Faro de Silleiro e que tivo que ser tratada nun pleno extraordinario, pola negativa a explicar as actuacións levadas a cabo para solucionar definitivamente un dos problemas que atañen aos límites do Concello, e que tamén afectan ao Plan Xeral.

Cómpre dicir que a día de hoxe non dispoñemos desta información a pesar da convocatoria do devandito pleno extraordinario e das preguntas que sobre o tema se fixeron nos catro plenos ordinarios celebrados “a posteriori”. Do mesmo xeito, temas de saneamento (As Mariñas, depuradoras, principalmente as de Viladesuso e Mougas, Loureza, etc.), a saúde (sen pediatra e cun só médico, e ás veces ningún), o estado das estradas. (Lurido, Pedornes, etc).

A xestión municipal nos últimos tres anos caracterizouse unicamente polo seu intento de control da prensa (secuestro do Faro de Vigo o día das pasadas eleccións municipais, intentos de dirixir as noticias publicadas na prensa dixital, etc).

A pesar de ter recibido nesta última lexislatura a maior cantidade de diñeiro de toda a historia do Concello, os graves problemas que ten Oia seguen sen resolver mentres se malgastan os cartos en investimentos de dubidosa eficacia.