Os irmáns Xosé e Ramón Trigo presentan no Rosal tres novelas gráficas ambientadas no Baixo Miño e na ría de Vigo

Os irmáns Xosé e Ramón Trigo presentarán mañá na sala de exposicións do Concello do Rosal tres novelas gráficas ambientadas no Baixo Miño e na ría de Vigo. O acto comezará ás 20.00 horas e esta organizado polo Colectivo Carballas co apoio do Concello. A alcaldesa, Ánxela Fernández, anima á veciñanza a asistir á presentación para desfrutar das grandes historias e ilustracións que se mostrarán nunha exposición que facilitarán os autores.

Os irmán Xosé e Ramón Trigo son, respectivamente, o guionista e o debuxante das tres novelas situadas no sur do Galicia, ambos son da Guarda.  “O burato do inferno” trata sobre o fenómeno do contrabando no Baixo Miño e no norte de Portugal, “Ricardo Mella, o home novo” relata a vida do escritor e pensador libertario, un dos teóricos máis brillantes do anarquismo español e natural de Vigo, e “Lobada” debuxa a historia da II Guerra Mundial en Galicia, concretamente na cidade olívica.

Os irmáns Trigo xa levan varias obras xuntos. Ademais Ramón Trigo como autor e ilustrador publicou en diversas editoriais máis de trinta libros ilustrados. Entre eles: Leviatán” (Premio Lazarillo, Premio Isaac Díaz Pardo, Editorial Kalandraka). “Yo vivía en el fin del mundo” (Premio Cabildo de Gran Canaria, Editorial Edelvives). “Casa vacía” (Premio Ciudad de Alicante, Editorial Anaya).