Os Socialistas de Oia piden un pleno extraordinario para tratar sobre os problemas no saneamento e en camiños municipais

Os Socialistas de Oia solicitaron a realización dunha sesión plenaria extraordinaria para tratar a problemática existente en varios puntos do municipio en canto ao saneamento e deficiencias en viarios e camiños municipais.

Esta sesión plenaria celebrarase o vindeiro luns día 20de decembro ás 9:30h da mañá, e na orde do día tratarase, a petición dos Socialistas de Oia, o lamentable estado de conservación dos camiños de os da Fonte e de Tallo en As Mariñas, o de Lourido en Mougás, os de cardorrio, Matovello e Salandrín, tramos que unen o camiño da Fonte co das Chedas, camiño de Pedornes, ( na parte que pasa ao lado do depósito de auga), camiño da Balla, todos eles na parroquia de Pedornes, camiño das Carballeiras en Oia, e outros no resto das parroquias.

Dende os Socialistas reclamarase nesta sesión plenaria se existe un plan de arranxo para estes problemas de seguridade vial e para cando está previsto a súa realización.

Do mesmo xeito os Socialistas de Oia pedirán na sesión plenaria información sobre cando se ten previsto realizar a conexión  do saneamento das Mariñas coa estación depuradora de Baiona e a adenda de Augas de Galicia.

Por último, desde o Grupo Municipal Socialistas pedirán en pleno a dotación de beirarrúas nos núcleos de Mougás e Pedornes e se existe unha data para a súa realización.