Os Socialistas de Oia solicitan un pleno extraordinario para tratar sobre a caótica situación sanitaria no municipio

O vindeiro xoves día 26 de agosto ás 8:00h da mañá a Casa do Concello de Oia acollerá un pleno extraordinario a petición do Grupo Municipal Socialista de cara a tratar a caótica situación sanitaria que se está a vivir dende fai tempo no municipio.

O Centro de Saúde de Oia, atende a una poboación menor de 15 anos de 341 rapaces e rapazas que non teñen servizo de pediatría e con unha poboación maior de 50  anos de 1495 persoas que non teñen médico a maioría dos días. Cando hai sorte, no Centro de Saúde atópase un só médico para atender os dous cupos, habendo días nos que no Centro de Saúde conta coa presenza de ningún médico; xerando atraso na atención necesaria para os pacientes, xerando nestes crispación, molestias e nalgúns casos incluso medo.

Nesta situación os aplausos que se daban as 20:00, convertéronse en reproches; de aplausos a insultos, de heroes a viláns.

O deterioro innegábel da xestión sanitaria en Galiza é un problema que hai que abordar dende a eficacia e sobre todo dende a responsabilidade, a nosa poboación cun marcado carácter rural, perde de forma galopante calidade asistencial.

Deste xeito trataranse nos puntos dedo día o seguinte:

1. Actuacións levadas a cabo por parte da alcaldesa para solucionar o problema sanitario.
2. Posta en marcha de medidas adecuadas para frear o desprestixio palpábel da relación médico-paciente acrecentado nestes últimos meses.
3. Garantía de consulta clínica presencial antes das 48 horas tras a demanda dos cidadáns.
4. O pronunciamento do pleno en favor dunha sanidade pública e de calidade.