Paseos polos muíños, xogos en familia e experiencias únicas: así será a Semana Santa no Rosal

O Rosal propón esta Semana Santa unha forma diferente de vivir o territorio, apostando por experiencias que van máis alá do turismo convencional. O Concello deseñou unha programación composta por catro actividades gratuítas que combinan natureza, patrimonio e vivencias sensoriais, pensadas tanto para a veciñanza como para quen visite o municipio nestas datas.

A iniciativa busca que as persoas participantes non só percorran espazos emblemáticos, senón que os sintan a través dos cinco sentidos, conectando coa esencia do Rosal desde unha perspectiva máis consciente e emocional. Iso si, todas as propostas contan con prazas limitadas, polo que será necesario inscribirse previamente.

Experiencias para descubrir o Rosal cos cinco sentidos

Un dos pratos fortes da programación serán os paseos sensoriais ‘Cata o lugar!’, dúas rutas interpretativas polos muíños do Folón e Picón, un dos enclaves máis recoñecidos do municipio. Durante estes percorridos, as persoas participantes poderán escoitar o son da auga, identificar aromas do monte, experimentar coas texturas e descubrir sabores ligados ao territorio.

Estas rutas celebraranse o venres 3 de abril pola tarde e o sábado 4 pola mañá, cun percorrido circular de 3,5 quilómetros que presenta certa esixencia física debido á pendente e ao terreo irregular.

Actividades para gozar en familia

A programación inclúe tamén propostas dirixidas ao público familiar. O xoves 2 de abril terá lugar ‘Primavera nos muíños’, unha actividade que combina xogos, adiviñas e dinámicas para achegar a cultura tradicional dos muíños aos máis pequenos.

Pola súa banda, o mércores 1 de abril desenvolverase ‘Pequen@s cabaqueir@s’, unha experiencia que permitirá coñecer o oficio tradicional dos telleiros a través de actividades lúdicas na contorna da Praza do Calvario e do Museo do Cabaqueiro.

Un modelo de turismo sostible e experiencial

Desde o goberno local destacan que esta programación encaixa nun modelo de turismo sostible, baseado na calidade e no respecto pola contorna. O obxectivo é ofrecer experiencias auténticas que poñan en valor o patrimonio sen provocar masificacións, ao tempo que se reforza a identidade local.

Neste sentido, o Concello convida a veciñanza e visitantes a participar nunha Semana Santa diferente, na que cada actividade se converta nunha oportunidade para redescubrir o Rosal desde outra mirada.

Máis propostas para unha Semana Santa completa

A programación complétase con outros eventos destacados que reforzan a oferta de ocio no municipio. Entre eles, o torneo internacional ORosalCup, que reunirá a máis de 350 nenos e nenas os días 3 e 4 de abril nas instalacións da Mata, consolidando ao Rosal como referente do fútbol base.

Ademais, do 1 ao 3 de abril a Praza do Calvario acollerá a campaña ‘Sabores da ría’, promovida pola Deputación de Pontevedra, con foodtrucks que ofrecerán petiscos gratuítos e material divulgativo sobre festas gastronómicas.

Por último, o domingo 5 de abril celebrarase unha nova edición do roteiro ‘A lingua das aves’, unha actividade guiada para aprender a identificar aves polo seu canto nun percorrido accesible polo entorno do río Tamuxe.

As persoas interesadas en participar en calquera destas propostas deberán formalizar a súa inscrición a través do teléfono ou WhatsApp no 677 78 32 96 ou no correo electrónico habilitado polo Concello.