Patricia Rodríguez, produtora de Na Abada, protagonista da primeira historia de Parte de ti

A vida de Patricia Rodríguez e a da súa familia cambiou coa chegada da covid-19. O negocio de flor cortada, que era a súa principal fonte de ingresos, caeu en desgracia por culpa do confinamento e tiveron que reinventarse.

Os invernadoiros da empresa familiar deixaron de producir flores para transformarse nunha explotación de hortalizas e froita. E naceu “Na abada”, un negocio familiar, ubicado na parroquia de Taborda (Tomiño), que aspira a asentarse para producir de xeito sustentable alimentos de proximidade que reparten a domicilio.

Na Abada é unha empresa de venda de froitas e verduras que combina as novas tecnoloxías e os xeitos de cultivo tradicionais, poñendo así a disposición dos consumidores produtos de tempada apañados na horta no momento, sans e libres de todo tipo de químicos, cun método de envasado que non produce residuos.

Teñen unha vertente clásica de forma que podes ter unha cebola de toda a vida pero tamén tratan de traer variedades de sementes distintas sen experimentación. O kilometro cero e a economía circular, son conceptos que intentan transmitirlle aos seus clientes.

“Sabíamos que esta oportunidade tiña que ser aproveitada para mellorar, e sabemos que coa nosa proposta estamos contribuindo a mellorar o agro, a mellorar a contorna e a mellorar a alimentación de cada cliente. En definitiva, estamos contribuindo a mellorar a nosa vida e as dos que desexan formar parte deste proxecto, que cada vez é maior.” Patricia Fernández, produtora

A voz que dá nome ao seu negocio “abada” indica a porción ou cantidade dunha cousa que se pode levar na aba dun vestido, mandil, etc.

Patricia saiu fora do seu lugar de orixe para formarse porque buscaba mellorar as condicións que tiñan os seus pais de traballo pero sempre criu que era posible vivir no agro.

Ela é unha das produtoras que forman parte da campaña Parte de ti, unha campaña do Grupo de Desenvolvemento (Galicia Suroeste Eurural) que por segundo ano vai enfocada a sensibilizar, concienciar e informar baseándose nas historias das produtoras e produtores. Cada unha destas historias cóntase en forma de vídeo para achegar a realidade do rural ao espectador.

O Grupo de Desenvolvemento (Galicia Suroeste Eurural) é unha entidade sen ánimo de lucro formada por todo o tecido asociativo que hai nos concellos de Fornelos de Montes, Pazos de Borbén, Redondela, Mos, O Porriño, Tui, Tomiño, O Rosal, A Guarda, Oia, Baiona, Nigrán e Gondomar máis os propios concellos e entre todos encárganse de elaborar unha estratexia de desenvolvemento rural para todo o territorio.

Os vídeos da campaña poderán visualizarse na web  https://partedeti.eurural.org/ e nas redes sociais de Eurural (@eurural_gdr14) . Ademais os produtores e comerciantes que vendan produto do rural poderán formar parte do directorio de Parte de ti cubrindo o formulario disponible na web (https://partedeti.eurural.org/queres-formar-parte-deste-proxecto/)