Presentación dunha nova fortaleza do XXVII que acredita a importancia do Baixo Miño na guerra con Portugal

Convidados polo xornalista e profesor da Universidade de Santiago de Compostela, Xurxo Salgado, a nosa candidata nas próximas municipais, Valentina Valderrey, asistiu,no Centro Tomiñés, á presentación dun novo achado que amplía o xa extenso patrimonio cultural do concello e que pon de manifesto a importancia do Baixo Miño na guerra con Portugal, cortando as incursións das tropas portuguesas cara a Tui.

O acto contou coa intervención da especialista Rebeca Blanco-Rotea quen confirmou a hipótese de Xurxo Salgado de que a fortificación no é de orixe medieval como apuntaron outros investigadores, senon do s. XVII.

“O novo forte está situado nun lugar estratéxico de paso entre os complexos fortificados de Amorín e Goián. Os restos atopados poderían ser parte dunha gran estrutura defensiva e nela puido terse acuartelado en 1666 un exército de máis de 15.000 homes.”

Tamén destacan o mal estado do xacemento alterado pola intervención humana:

“O xacemento atópase moi arrasado como consecuencia posiblemente de feitos históricos que teñen que ver coa propia guerra e os procesos postdeposicionais que sufriu con posterioridade á mesma, relacionados coas actividades de explotación agroforestal do territorio. É por isto, que se considera urxente a súa notificación para que se inicie a protección e estudo deste espazo que permita conservar os escaos restos que se mantiveron no lugar”, destaca Rebeca Blanco-Rotea quen xa o remitiu á Dirección Xeral de Patrimonio Cultural para a súa catalogación e protección

Ao acto estabamos convidadas todas as formacións políticas do concello. Cabe salientar a falta de interese do equipo de Goberno do Concello que nin a súa rexedora nin ningún representante acudiron á cita.

Queremos, dende Podemos Tomiño, agradecer a Xurxo Salgado e a Rebeca Blanco-Rotea polo traballo de investigación tan importante que desenvolven e por facernos partícipes destas novas de maneira tan clara e didáctica.