Socialistas de Tomiño abandonan o pleno ante a -prepotencia institucional- do Goberno do BNG

Violeta de Santiago e Mirta Misa, concelleiras do PSdeG en Tomiño, decidiron abandonar a sesión plenaria celebrada este xoves 1 de decembro no Concello en sinal de protesta, por non consensuar "nunca" o Goberno municipal as datas das sesións.

"Consideramos unha falta de respecto e lealdade á Corporación municipal a imposición do Pleno no día de onte, tendo en conta a importancia do debate e aprobación do orzamento xeral que será o documento económico que rexirá o vindeiro ano, e o tempo mínimo para estudar a fondo a documentación. Pretende o BNG que un documento que levou casi tres meses elaborar, o examinemos en unha semana, pois recibimos a documentación o mércores día 23", denuncian as edís socialistas.

O PSdeG de Tomiño indica que é "inaudito" que durante cinco meses se teña celebrado un único pleno ordinario, e que se convoque nunha mesma semana á Comisión Informativa de Asuntos Plenarios e o propio pleno sen consenso cos demais membros da Corporación, e aducindo razóns "disparatadas" para non aprazalo como que "a maioría da súa xente saíra de vacacións a vindeira semana", ou que resta unha sesión por celebrar antes de rematar o ano.

As socialistas de Tomiño consideran estes argumentos incribles, polo feito de que o único responsable de non ter convocado as sesións en tempo é o propio Goberno municipal, segundo aseguran. "Do asueto dos concelleiros e concelleiras non vou comentar nada máis, pois creo que xa se comenta só", manifestou a voceira socialista, Violeta de Santiago.

Con respecto ao documento orzamentario, De Santiago explica que o incremento no mesmo se debeu á incorporación dunha partida do Plan de Concellos da Deputación de Pontevedra que será destinada a gastos correntes, o que evidencia "a pésima situación económica do Concello, que non está para sacar peito precisamente, xa que a maioría das Concellerías sofren un recorte importante".

As do PSOE denuncian que o anuncio dun incremento do salario dos funcionarios nun 5% é falso, indicando que está consiganada unha suba dun 2,5% establecida nos Orzamentos Xerais do Estado, dun 0,5% máis vinculado ao PIB e dun último 0,5% vinculado ao IPC, a revisar en setembro de 2023, que se abonará se se dan as circunstancias axeitadas, polo que en todo caso chegaríase ao 3,5%.

Expoñen, así mesmo, que o importe de remanente de tesourería de 3,8 millóns de euros, "síntoma de bo facer publicado na prensa", tamén e falso, pois "a día de hoxe non hai remanente ningún á espera da liquidación do exercicio.

Por todo isto, as socialistas tomiñesas indican que o BNG "minte á cidadanía, e minte tamén aos seus votantes con estas declaracións, que non se axustan á verdade". Fartas desta situación de "prepotencia institucional", as concelleiras do PSdeG decidiron abandonar o pleno do pasado 1 de decembro en sinal de protesta, para que o Goberno do BNG entenda que "o Concello non é o seu cortixo, que a Corporación está constituída por 17 concelleiras e concelleiros, que non todas gobernamos pero si contamos, formamos parte deste órgano colexiado e representamos a unha parte da veciñanza de Tomiño", conclúen.