Suspendida a sesión de cinema deste xoves en Goián organizada polo Cineclub Poleiro

Intentámolo, pero as restricións aprobadas polo Concello de Tomiño, relacionadas coa alerta 3 do covid, impídennos seguir co ciclo. 

O Concello comunicounos onte que non podemos proxectar a película prevista para este xoves porque limitan a 5 persoas o aforo en instalacións municipais. 

CAPHARNAÜM, unha película libanesa, premio do xurado en Cannes, e a galega A ILLA DAS MENTIRAS de Paula Cons abren o ciclo de outono no Auditorio de Goián .

Para que a cultura non pare, o cineclub Poleiro retoma a actividade con medidas de seguridade , distancia e uso obrigatorio de máscara.
O xoves 8 de outubro, ás 21:30 horas arranca un novo ciclo no Auditorio de Goián coa película CAPHARNAÜM escrita e dirixida por Nadine Labaki. Converteuse na película de Oriente Medio de maior recadación de todolos tempos despois dun grande éxito internacional.
Sinopse: Conta a historia de Zaín un neno de 12 anos condenado a cinco anos de cárcere por acoitelar a un home. Denuncia aos pais e cando o xuíz lle pregunta por qué, contéstalle : “porque nacín” expresando que eles son os responsables da súa dura vida.
O xoves 5 de novembro o cineclub proxecta A ILLA DAS MENTIRAS dirixida por Paula Cons.
Sinopse: Madrugada do 2 de xaneiro de 1921. Naufraxio frente a illa de Sálvora do buque Santa Isabel con destino a bos Aires. Tres mulleres bravas salvan a preto de 50 náufragos. Un xornalista arxentino investiga o suceso e descubre moitas incógnitas. Historia e ficción sobre as heroínas de Sálvora.
O xoves 3 de decembro é o turno de BENZINHO unha película dirixida polo brasileño Gustavo Pizzi . Conta a historia dunha ama de casa de Rio de Janeiro con catro fillos que acolle á súa irmán e ao seu sobriño.
Pechamos o ciclo o xoves 14 de xaneiro cunha película colombiana baseada nunha historia real, que explica a orixe do narcotráfico en Colombia, PÁJAROS DE VERANO , dirixida por Ciro Guerra e Cristina Gallego .