Tomiño abre as portas á XXI Feira de Cultivos do Baixo Miño con tres días dedicados ao viveirismo galego

Tomiño xa quenta motores para unha das citas máis importantes do calendario económico e social da comarca. A XXI Feira de Cultivos do Baixo Miño converterá novamente Goián no gran escaparate do viveirismo galego do 22 ao 24 de maio, reunindo profesionais, empresas, persoas expertas e centos de visitantes arredor dun sector clave para a economía do territorio.

A Praza Pintor Antonio Fernández será o epicentro desta nova edición organizada polo Concello de Tomiño e pola Asociación de Cultivos do Baixo Miño (acuBam), unha feira que se consolidou ao longo das dúas últimas décadas como unha referencia autonómica no ámbito verde e do viveirismo.

A alcaldesa de Tomiño, Sandra González, destacou que esta feira “é unha mostra do potencial dun sector que forma parte da alma económica e social do noso concello”. A rexedora puxo ademais en valor a evolución dun evento que “soubo medrar e adaptarse para achegar o viveirismo á veciñanza e facer partícipe á cidadanía dunha actividade esencial para Tomiño e para toda a comarca”.

González incidiu tamén na importancia dunha cita que representa “unha maneira de entender o desenvolvemento local desde a sostibilidade, a innovación e a colaboración”, converténdose nun espazo aberto no que conviven actividade profesional, divulgación e ocio familiar.

Pola súa banda, a presidenta de acuBam, Nuria Castro, sinalou que a Feira de Cultivos “é moito máis ca unha exposición profesional”, xa que permite compartir coñecementos, tendencias e experiencias ao tempo que se visibiliza o traballo que desenvolve o sector do viveirismo no Baixo Miño.

A programación desta XXI edición volverá combinar actividade profesional e propostas pensadas para todos os públicos, cun amplo programa de conferencias, obradoiros prácticos, expositores especializados, música e actividades divulgativas ao aire libre.

Entre os grandes atractivos deste ano destaca a presenza do coñecido paisaxista e divulgador Íñigo Segurola, que actuará como padriño da feira e ofrecerá unha das charlas centrais do evento. Tamén participará a influencer Nuska Chousa, reforzando a aposta da organización por conectar coas novas xeracións e achegar o mundo verde e o viveirismo a novos públicos a través de formatos actuais e próximos.

Durante tres días, Goián converterase así nun punto de encontro arredor da innovación, da sustentabilidade e do enorme potencial dun sector que continúa sendo un dos motores económicos e identitarios do Baixo Miño.