Tomiño homenaxea a Hortensia Expósito, Tena, nas Festas do Alivio 2024

O próximo sábado 14 de setembro, o Concello de Tomiño celebrará unha sentida homenaxe no marco das Festas do Alivio 2024 a Hortensia Expósito Martínez, coñecida como Tena, recoñecendo unha vida de loita, traballo duro e superación. O acto cívico terá lugar na Praza do Seixo ás 21:00 horas, seguido do tradicional concerto da Agrupación Musical de Goián.

Tena, nacida en 1937 en Vilachán do Monte en plena guerra, representa o exemplo vivo de moitas mulleres do rural galego que, sen facer ruído, levaron o peso do traballo no campo e o coidado das súas familias. A alcaldesa de Tomiño, Sandra González, destacou que "a historia de Tena é un recordo vivo dunha xeración de mulleres fortes que non sempre foron recoñecidas, pero que resultaron imprescindibles para a nosa sociedade".

Criada nun entorno marcado pola emigración e a adversidade, Hortensia foi testemuña da partida de moitos homes á América e viu como as mulleres quedaban a coidar os fogares alleos. Dende pequena, asumiu o traballo do campo, coidou dos seus pais e criou soa a tres fillos. Traballou duro, tanto na casa como nas plantacións de pinos da Forestal e nos quilómetros de regos que levaron a auga ás vivendas de Vilachán. Para ela, todo isto era simplemente "o que facían todas as mulleres daquela época: traballar e tirar adiante".

Agora, Tena busca que a loita e sacrificio das mulleres como ela non se perda, non tanto polo seu recoñecemento persoal, senón polas xeracións futuras, para que non se esquezan dos valores de esforzo e resistencia que estas mulleres encarnan.

Programación:

As Festas do Alivio comezarán o luns 9 de setembro cunha semana chea de actividades para todos os públicos na Praza do Seixo. A semana abre coa actuación de Simplemente Enricco, un mago e malabarista peculiar, ás 19:00 horas. O martes, Marta Ortiz presentará ‘Tralará. Contos, obxectos e música’, un espectáculo que une tradición e actualidade. O mércores 11 será o turno de Peter Punk co seu show ‘Peor imposible’, e o xoves 12 rematarán as actividades familiares coa ‘Peque Disco’ de Moc Moc, unha mestura de música, circo e clown.

A alcaldesa Sandra González resaltou que "as Festas do Alivio son unha oportunidade única para unir a todas as parroquias de Tomiño nun ambiente de celebración e comunidade". Agradeceu tamén o esforzo da Comisión de Festas, cuxa dedicación fai posible que o evento sexa todo un éxito cada ano.