Tui, O Rosal, Tomiño, A Guarda e Oia adhírense ao servizo de cita previa da Deputación de Pontevedra

A presidenta da Deputación, Carmela Silva, remitiu hoxe unha carta aos concellos para informarlles desta nova prestación, que xa teñen operativa e que será fundamental para que poidan planificar o control de aforo nas oficinas municipais, a fin de axudar "a manter a distancia de seguridade da cidadanía que precise acudir ás dependencias do concello, evitando así colas e aglomeracións".

Coa nova ferramenta, a cidadanía que queira dirixirse ao seu concello para a realización dalgunha xestión terá a opción de facer clic na Cita Previa na sede electrónica e na solicitude poderá elixir se a cita será presencial, telefónica ou por videoconferencia. Será o concello o que decida que servizos e departamentos terán cita previa e cando esixirá aos veciños e veciñas facer a súa reserva, se a través de certificado ou simplemente con cumprimentar un formulario. Así, os concellos tamén poderán organizar diferentes axendas (por exemplo para o rexistro, padrón ou para outros departamentos) e configurar diferentes franxas horarias de atención ao público. O novo servizo estará dispoñible a través de tablets e dispositivos móbiles. Nesta semana, os concellos recibirán asesoramento por parte do persoal para que poidan aplicar esta nova función da súa sede electrónica, e están programados a tal efecto varios seminarios web, coa posibilidade, se é preciso, de organizar novas sesións de formación.

Este novo servizo complementa os que xa podían realizar os 53 concellos adheridos á administración electrónica coa ferramenta virtual habilitada dun xeito totalmente gratuíto pola Deputación, en concreto a celebración de sesións telemáticas dos órganos colexiados, así como reunións e plenos virtuais, mesas de contratación a distancia, así como traballo colaborativo entre persoal funcionario. Amais, o sistema, ao que se pode acceder a través de ordenadores e dispositivos móbiles, permite retransmisións en directo a través da propia sede electrónica ou plataformas nas redes sociais, garantindo unha maior transparencia.

Máis polo miúdo, os concellos que están adheridos a este servizo ofrecido pola Deputación son: Poio, Tui, Cambados, O Rosal, Tomiño, Baiona, Vila de Cruces, Mos, A Cañiza, Bueu, Cangas, Redondela, A Estrada, Lalín, A Guarda, Salceda, O Porriño, Moaña, A Illa de Arousa, Soutomaior, Ponte Caldelas, Ponteareas, Meaño, Gondomar, Salvaterra, O Grove, Silleda, Caldas, Valga, Vilaboa, Meis, Cuntis, Mondariz, Moraña, As Neves, Barro, Forcarei, Catoira, Portas, Pontecesures, Pazos, Oia, Arbo, Rodeiro, A Lama, Covelo, Agolada, Crecente, Campo Lameiro, Fornelos, Dozón, Mondariz-Balneario e Cerdedo-Cotobade, amais das Mancomunidade do Salnés, do Val Miñor e do Morrazo.