Un acto na Guarda lembrará ás mulleres que axudaron aos presos do Campo de Concentración de Camposancos

A Asociación para a Recuperación da Memoria Histórica (ARMH) do Campo de Concentración de Camposancos e Fosa Común de Sestás celebrará este sábado 23 de maio, ás 12.00 horas, un acto de homenaxe ás coñecidas como “Mulleres con Coraxe”, nun recoñecemento á memoria das mulleres vinculadas ao antigo Campo de Concentración de Camposancos.

O acto terá lugar na rotonda situada entre o colexio dos xesuítas e a urbanización Río Miño, en Camposancos, onde se descubrirá unha placa conmemorativa dedicada a todas aquelas mulleres que sufriron a represión franquista ou que contribuíron a facer máis soportable a vida dos prisioneiros durante os anos de funcionamento do campo.

A homenaxe pon especialmente o foco nas chamadas lavandeiras, mulleres que colaboraban cos presos lavándolles a roupa, actuando como enlace co exterior ou facilitándolles materiais para que puidesen elaborar pequenos obxectos e combater así as longas horas de reclusión.

Desde a ARMH destacan tamén a necesidade de lembrar a aquelas mulleres que estiveron presas no propio campo de concentración e a tantas outras que sufriron persecución, malos tratos e represión simplemente por seren consideradas transgresoras, por saír dos roles impostos pola época ou por seren familiares e esposas de republicanos.

A placa que será descuberta durante o acto servirá como símbolo de memoria e recoñecemento “a todas as Mulleres con Coraxe, ás que penaron neste Campo de Concentración, ás que sufriron a represión franquista, ás que pagaron coa súa vida, ás que lle fixeron a vida máis doada aos prisioneiros e ás súas familias”.

A entidade organizadora agradeceu ademais a colaboración da Entidade e do Concello da Guarda para a celebración desta homenaxe, que busca manter viva a memoria histórica e dignificar o papel das mulleres nun dos episodios máis duros da historia recente da comarca.