Un motorista perdeu a vida tras sufrir unha caída en Tui

Un motorista faleceu logo de caer da moto que conducía na estrada PO-340, ao seu paso pola parroquia de Malvas, no concello de Tui.

Arredor das seis e cuarto da tarde, unha persoa particular alertaba ao 112 Galicia deste sinistro e, deseguido, tamén os servizos sanitarios confirmaban o accidente e indicaban ademais que a persoa estaba inconsciente.

De xeito inmediato, os xestores do 112 Galicia comunicaban os feitos á Garda Civil de Tráfico, aos Bombeiros do Baixo Miño e tamén á Policía Local e Protección Civil de Tui.

Xa no lugar, os servizos de emerxencias non puideron máis que confirmar o falecemento do motorista.

Unha persoa excarcerada en Lobios
Por outra banda, os servizos de emerxencia liberaron, esta tarde, a un home que quedara atrapado no seu vehículo logo de sufrir unha saída de vía no concello ourensán de Lobios.

Foi un particular quen, pasadas as dúas e media da tarde, informaba ao 112 Galicia de que un coche se saíra da estrada e caera para unha leira lindeira. Segundo sinalaba esta persoa, o vehículo atopábase envorcado do lado da porta do condutor, polo que non podía saír.

Con estes datos, dende o CIAE 112 Galicia deuse aviso ao GES de Lobios, á Garda Civil de Tráfico e aos servizos sanitarios.

Xa no punto, os membros do Grupo de Emerxencias Supramunicipal da localidade excarceraron, ilesa, á persoa atrapada, que era a única implicada no accidente.