Unha unidade móbil de doazón de sangue estará en Tomiño o luns 11 de xullo

O vindeiro luns 11 de xullo, o concello de Tomiño recibirá unha nova visita dunha das unidades móbiles da Axencia Galega de Doazón de Sangue, Órganos e Tecidos (ADOS). A unidade estará instalada durante toda a xornada na rúa Daniel Calzado Poceiro de 10:00 a 14:00 e de 16:00 a 21:00 horas para todos aqueles que queiran achegar a súa pinga de solidariedade. Todas as persoas que desexen doar sangue poderán solicitar cita previa chamando ao teléfono gratuíto 900 100 828.

Poderán doar as persoas con máis de 18 anos e máis de 50 kg e deberán ir despois de almorzar se acoden pola mañá ou dúas horas despois de xantar ao mediodía se acoden pola tarde. É importante levar a tarxeta de doazón, o DNI ou un documento similar, ademais de informar ao médico en caso de estar tomando algún medicamento. Aínda que o persoal da unidade móbil fai unha revisión a todas as persoas que se achegan a doar para garantir a seguridade dos compoñentes da sangue, recoméndase non acudir se nos últimos 15 días se tivo febre, tose ou problemas respiratorios.

A Axencia de doazón de órganos e sangue (ADOS), grazas ao emprego destas unidades móbiles, tenta facilitar o xesto solidario de doar sangue entre tódolos cidadáns. Sen a implicación de todos é imposible acadar as 500 doazóns de sangue que precisan nos hospitais galegos cada día -arredor de 10.000 ao mes- para garantir a asistencia a moitas persoas que son sometidas a intervencións cirúrxicas, que sufriron accidentes de tráfico ou laborais, que padecen anemias, hemorraxias, cancros, leucemia, transplantes de órganos...