Uxía Senlle homenaxea en Tui a Begoña Caamaño co concerto -A tecedeira de soños-

O Espazo Sociocultural de Tui acollerá mañá xoves, 21 de maio, ás 20.00 horas, un concerto moi especial da cantante galega Uxía Senlle. Baixo o título “A tecedeira de soños”, a artista ofrecerá unha proposta íntima e emotiva creada como homenaxe á escritora e xornalista viguesa Begoña Caamaño, protagonista este ano do Día das Letras Galegas.

Acompañada por Sabela da Cal ao acordeón e Rafa Otero ás guitarras, Uxía interpretará un repertorio composto especificamente a partir dos textos e da obra literaria da súa grande amiga Begoña Caamaño, nun espectáculo no que música e literatura se funden nun diálogo cargado de emoción e memoria.

Este Día das Letras Galegas ten para Uxía Senlle un significado especialmente persoal. A artista mantivo unha estreita amizade con Begoña Caamaño e decidiu renderlle tributo desde ese vínculo afectivo, mergullándose nos seus libros e no seu universo literario para crear novas composicións inspiradas na súa palabra e no seu legado.

Uxía Senlle, natural de Sanguiñeda (Mos), é unha das voces máis recoñecidas da música galega contemporánea. Cunha traxectoria de máis de corenta anos, destacou pola divulgación da poesía galega, a renovación da música tradicional e a súa conexión coas culturas lusófonas. Ao longo da súa carreira colaborou con artistas como João Afonso, Dulce Pontes, Rui Veloso ou Tito Paris e participou en múltiples proxectos culturais de referencia como Cantos na Maré, Enredadas ou De tu casa a la mía.

A súa discografía e traxectoria foron recoñecidas con galardóns como o Premio da Crítica Galicia ou o Premio ao Mellor Álbum de Música de Raíz nos Premios da Música Independente de España.

A concelleira de Ensino, Cultura e Mocidade de Tui, Sonsoles Vicente Solla, destacou que esta actuación “é unha ocasión excepcional para achegarnos á voz fermosa e serena de Uxía, que logra unha fusión de música e literatura de enorme calidade e atractivo a través dos poemas e textos da súa amiga Begoña Caamaño”.

O concerto forma parte da programación cultural “Tui en letras”, impulsada polo Concello de Tui, e chega á cidade dentro do programa “Falaredes”, promovido pola Secretaría Xeral da Lingua para fomentar o uso do galego e apoiar a creación artística na nosa lingua.

A entrada será libre ata completar aforo.