X aniversario do lume Oia - O Rosal 2013-2023

O pasado día 26 de agosto cumpriuse 1 década dende que ardeu o Val do Carballas (Tamuxe), Oia – O Rosal, onde foron devoradas máis de 2.000 hectáreas entre a Serra da Groba e a Serra do Argallo, cunhas condicións extremas endexamais vistas na nosa contorna ata os lumes avivados polo furacán Ophelia en outubro de 2017.

Esta foi unha das faíscas que precipitaron a creación da nosa asociación A Jalleira, cos obxectivos entre outros de fomentar e promover o estudo e coñecemento do noso entorno natural así como a súa conservación e restauración a través de distintas actividades: voluntariados de limpeza e plantación, proxeccións audiovisuais, xornadas forestais, saídas (xeolóxicas, botánicas, micolóxicas...) , cursos de diferente índole, campañas de concienciación, etc...

Pasados 10 anos deste fatídico 26 de agosto de 2013 e grazas ás magníficas condicións da nosa contorna (factores climatolóxicos, factores topográficos, características especiais do material vexetal natural, características físicas, químicas e biolóxicas do solo), podemos observar unha evolución favorable das especies vexetais, tamén observamos melloras na nosa fauna como por exemplo a proliferación do corzo (Capreolus capreolus) na zona, ausente nas nosas serras durante décadas.

Se ben a política forestal pública Galega non termina de mudar, si se está promovendo un cambio no noso ámbito grazas ao traballo das diferentes CMVMC, á veciñanza, ás diferentes asociacións medioambientais, plataformas e distintos colectivos da nosa contorna que debe ser o modelo a seguir por parte das administracións públicas para mellorar o entorno natural.

Hoxe en día non só temos que estar pendentes dos lumes que podan vir, senón tamén existen outras actividades que atanen perigo constante para os nosos ecosistemas, como son: os proxectos eólicos, a fauna e flora alóctona, centrais reversibles de auga, minaría, diferentes tipos de contaminantes, etc...

Dende aquí animamos á xente a que participe na mellora da nosa contorna, colaborando cos diferentes colectivos que enriquecen e protexen a natureza e o patrimonio para poder paliar a pegada do ser humano no medio natural, co obxectivo de que as nosas futuras xeracións poidan gozalo e aproveitalo, canto menos, da mesma forma ca nós.

Se ves lume chama ao teléfono gratuíto 085.

Saúde e monte!!

Asociación Forestal e de Educación Ambiental, A Jalleira