Carta aberta do expresidente da Comisión de Festas do Monte a Fátima Iglesias ( secretaria da Asociación Atalaya)

 Permítame en primeiro lugar que como  expresidente das Festas do Monte durante os últimos  11 anos, 12 formando formando parte da Comisión, e en nome das persoas que me acompañararon nesta gratificante tarefa, faga un pequeno repaso do que foi o noso paso pola Comisión de Festas.

Ó longo de moitos anos foron distintas Comisións formadas por cidadáns normais as que se encargaron de levar adiante as nosas festas. Nestes últimos doce anos fomos un grupo de cidadáns tamén normais os que traballamos de xeito silencioso e sen protagonismos persoais  tratando de facer  unhas festas que estiveran á altura do que o noso pobo se merece.

Cando este grupo de xente decidimos facernos cargo da organización das Festas do Monte no ano 2000 eramos conscientes da responsabilidade que asumiamos, eramos conscientes tamén  de que estaríamos suxetos a críticas, pero sobre todo eramos conscientes da importancia e do significado que as Festas do Monte teñen para o noso pobo.  Seguro que cometemos erros, tamén acertos; tivemos, como previamos, críticas:unhas fundadas outras pensamos que non; pero en todo momento tiñamos claro o noso obxetivo que non era outro que facelo o mellor posible.

    O grupo de xente que eu tiven a honra de presidir, tiña e ten unha afinidade política concreta que de todos é sabido,pero en ningún momento ó longo destes anos iso foi un impedimento para que se fixesen as cousas de xeito natural e sen estrondos, mais ben nos obrigou a ser máis rigorosos e serios se cabe.

   Proba desta naturalidade é o feito de que ó longo de todos estes anos  contamos coa colaboración incondicional de tódalas asociacións culturais e deportivas do Concello e sentimos  o  apoio da meirande parte dos cidadáns e do comercio guardés.

   Cremos que  co traballo de todos, tamén co noso,as Festas do Monte acadaron un lugar importante dentro das Festas de Galicia, son un referente para toda a provincia e especialmente para a Comarca do Baixo Miño e non esquezamos  que no ano 2009 logramos que fosen declaradas de Interese Turístico pola Xunta de Galicia. 

  Non entendo, non entendemos por tanto, a súa actuación nestes últimos días en relación coa formación dunha nova Comisión de Festas. ¿ Realmente tivo en algún momento conciencia do que significa organizar as Festas do Monte, ou foi simplemente un novo exercicio de protagonismo e frivolidade ós que nos ten tan acostumbrados? ¿ Como é posible?. Vostede rexistra no Concello un escrito que case que viña a esixir que se lle entregase a Comisión de Festas posto que, “contaban con un equipo experimentado y sobradamente capaz” e cando o Concello lle contesta que se dá por enterado de que a asociación que vostede  representa (ATALAYA) será a encargada de organizar as Festas do Monte 2012  desexándolle os maiores éxitos e  brindándolle  toda a colaboración, sorpréndenos  vostede rexistrando no Concello   outro escrito renunciando a organizalas alegando críticas e supostas ameazas. ¿ É este o compromiso que vostede dicía ter co pobo da Guarda? ¿ Vostede é a que pretendía ter altas responsabilidades neste pobo?

“ És que me criticaron” Tamén a min, a diario, ¿ De que se estraña?,con críticas ten que contar,non esqueza que tanto vostede como eu  somos representantes públicos, cunha única diferenza, a súa vocación foi repentina e a miña ven de hai moitos anos. Pero é que ademais  non nos enganemos, vostede é unha especialista en criticar e difamar, senón que mo conten a mín.

   Se mo permite vou atreverme a darlle un consello, medite vostede sobre a súa traxectoria dende que decidiu dedicarse á política e pregúntese vostede se de verdade ten vocación de servizo público ou mais ben o que buscou sempre foi un protagonismo persoal desmesurado sen importarlle en absoluto o dano que puidera estar causando, incluso  a persoas moitas veces cercanas a vostede.

 ¿É vostede consciente do dano que lle fixo á Festa do Monte? Non esqueza que outro grupo de xente estaba disposto a organizar as Festas e renunciaron debido  ó interese desmedido que vostedes mostraron. Nin fago nin deixo.¿A que está xogando? A que a Festa do Monte corra a mesma sorte que a do Santísimo que desapareceu no momento en que vostede se fixo cargo dela.

    Non se equivoque, vostede non é a protagonista, a protagonista é a Festa e por tanto o pobo da Guarda. Non xogue vostede  co sentimento e as ilusións de boa parte da sociedade guardesa que considera  que as Festas do Monte son un patrimonio dos guardeses e que deben ser tratadas como tal, con seriedade e con respeto, en ningún momento poden  ser tratadas coa frivolidade que vostede o fixo.

   Atte.

            Miguel A. Español Otero

       Expresidente das Festas do Monte Sta. Tecla