Pero tampouco desta vez a Serra do Galiñeiro é proposta pola consellería do Medio Rural como espazo a protexer, quedando a serra exposta a calquera agravio ambiental no presente e no futuro. As autoridades ambientais de Galicia permítense isto a pesar de que a serra do Galiñeiro alberga alomenos nove Hábitats de Interese Comunitario: turbeiras, carrasqueiras, vexetación de rochas silíceas etc. E non só os hábitats son de interese natural senón que a serra da acubillo a unha especie vexetal e nove especies de animais que requiren protección estricta segundo as Directrices Europeas: son narcisos, anfibios, réptiles e morcegos. Para algunhas delas é preciso determinar zonas de especial conservación e outras requiren protección estricta.

Por estes motivos a Plataforma alega que a Serra do Galiñeiro debe ser incluída como Lugar de Interese Comunitario (LIC) dentro da normativa REDE NATURA 2000.

Ánte este panorama de abandono do medio natural por parte das autoridades galegas esta Plataforma segue con actuacións encamiñadas a dar a coñecer aos cidadáns os valores da serra, os problemas cos que vive e os perigos que a ameazan.

A Plataforma pola Protección da Serra do Galiñeiro organiza unha MESA REDONDA SOBRE A ENERXÍA EÓLICA. Esta vez o esceario será Vigo, a poboación máis grande das que teñen territorio na serra do Galiñeiro, e a que máis cidadáns aporta ao uso e disfrute deste espazo natural.

Celebrarase na tarde do sábado 25 de febreiro e disertarase sobre os beneficios económicos da enerxía eólica, a avaliación do impacto ambiental desta enerxía e a implantación da enerxía eólica en Galicia. Farase unha comparativa co caso da Comunidade Valenciana para posteriormente e xa en mesa redonda confrontar a explotación eólica por empresas multinacionais coa explotación da enerxía eólica como enerxía alternativa fronte aos combustibles actuais non renovables.

Vaise celebrar en Vigo, no antigo reitorado e actual Auditorio Municipal do Areal e será dende as 5 da tarde ás 9 da noite, tal como detallamos no cartaz adxunto.

Para máis información pódese consultar as nosas páxinas web:
http://www.serradogalinheiro.org
http://www.facebook.com/Serra.do.Galinheiro