Máis  dun cento de persoas se achegaron na tarde de onte a darnos o seu apoio, o seu alento, a súa forza para afrontar o cambio  que Tui  necesita. Porque nós presentámonos a estas eleccións coa firme vontade de liderar o goberno do cambio desta  magnifica cidade chamada Tui e percorrer xunto a vos os camiños que nos leven a acadar un futuro de benestar para todos e todas.

Se a cidadanía de Tui me concede a inmensa honra de ser lider deste cambio, coa extraordinaria equipa que me acompaña, enfiaremos a politica municipal cara aos rumbos que nos temos marcado. O rumbo que nos levará ao camiño da creación de emprego e riqueza, da potenciación dos servizos públicos e da dotación das infraestruturas que Tui necesita.

Somos conscientes de que os  tempos son dificiles. Pero temos unha candidatura de xente experimentada e capacitada para sortear as dificultades, para afrontar novos retos e para apostar por políticas innovadoras e transformadoras. Políticas que funcionan, como xa temos demostrado alí onde gobernamos. Aí tendes, por exemplo, Tomiño ou Salceda de Caselas , ambas as duas vilas dinamizadas e modernizadas polo BNG, vilas amables e acolledoras onde vivir e traballar. A próxima ten que ser Tui!.

O goberno do BNG apostará polo emprego e as politicas sociais, porque temos dereito   a vivir aquí do noso traballo, programaremos escolas obradoiro, promoveremos a reactivación do pequeno e mediano comercio, mellorando as infraestructuras turisticas e levando a cabo unha politica de promoción do turismo con todas as súas potencialidades, entre elas o  casco vello, a beira do rio Miño ou o Monte Aloa.

Demandaremos a conexión do polígono de Areas coa futura vía de alta capacidade Tui-A Guarda para potenciar a nosa industria.

Crearemos, con carácter de urxencia, un aparcadoiro subterráneo e unha liña de transporte público eficaz que comunique a cidade coas parroquias co obxecto de que a Tui sexa mais cómodo e de que se reactive a súa economía. Neste sentido tamén será necesario a aplicación dun Plan de Tráfico que facilite a accesibilidade e mobilidade en Tui.

Loitaremos pola urxente construción do novo Centro de Saúde, moderno e público, con maior cobertura sanitaria en diversas especialidades e, en particular, en pediatría

Demandaremos a creación dunha escola infantil, integrada na rede pública, e impulsaremos a creación dun centro de día.

O BNG ocuparase do mantemento de todos os centros educativos de Tui así como do do Conservatorio, en permanente comunicación e consenso coas diferentes ANPAS dos Centros; tendo especial atención coa seguridade na contorna educativa.

Impulsarase a creación de comedores escolares e servizos de atención aos nenos e nenas a primeira hora da mañá para promover a conciliación da vida familiar e laboral.

Neste momento está en xogo o futuro de Tui . O noso futuro. Podemos optar por máis do mesmo ou por dar un xiro de timón e enfiar novos rumbos que nos levarán aos caladoiros da creación de emprego e riqueza, da potenciación dos servizos públicos, e da dotación das infraestruturas que Tui necesita.

En definitiva,afrontar politicas de benestar para todos e todas. Actuacións que nos permitiran vivir, traballar e disfrutar con dignidade na nosa cidade.