A Guarda da a benvida ao mes de setembro esta fin de semana coas Festas da Guía e o ciclo -Camposancos de Cine-

O xoves, 1 de setembro, celébrase unha xornada adicada á xuventude na Praza Avelino Vicente a partir das 20 horas. Neste evento os máis cativos quedarán cautivados pola maxia da actuación do Mago Marco. Pero ademais haberá moita música, coa Banda Xuvenil de Mougás, a Coral polifónica da Guarda e o concerto do grupo Pretty Shirts.

O venres día 2, pola noitiña, ofrecerá un concerto o grupo Batemento, que irá seguido polas actuacións das orquestras Los Estelares, Ícaro e Santos Morcegos.

Ó día seguinte, o sábado 3 de setembro, da comezo o primeiro Ciclo de Cine "Camposancos de Cine". Este acollerá a estrea de 3 películas feitas por directores, actores e veciños do pobo relacionados co mundo audiovisual en tres datas ao longo do mes de setembro. A primeira será a proxección o día 3, ó aire libre na Praza de San Amaro ás 21,30 horas, da curta de Nani Matos Lurna.

Tamén o sábado terá lugar o VII Torneo de Cachiza da Gándara na rúa das Pozas ás 16 horas. E nas Festas da Guía a noite do sábado estará amenizada polo concerto de Mayor Tom. Despois tomarán o relevo, para completar a velada, a orquestra Los Duendes e Dumore & Christian.

No derradeiro día da fin de semana e das Festas da Guía, o domingo día 4, celebrarase ás 11 horas da mañá a misa, seguida da procesión co Grupo de Gaitas da 3ª Idade e Refaixos e Polainas. Xa pola tarde, ás 17 horas, terán lugar as tradicionais poxas. E como colofón haberá á medianoite unha gran tirada de fogos de artificio e un espectáculo de Flyboard no Porto da Guarda.

Invítase a todos os veciños, veciñas e turistas a desfrutar da Guarda, da súa variada axenda cultural e dunha das súas festas nesta primeira fin de semana do mes de setembro.

Da comezo este sábado 3 de setembro o primeiro Ciclo de Cine "Camposancos de Cine"

A Comunidade de Montes de Camposancos, a asociación Os Amigos e a Entidade Local Menor de Camposancos están a unir forzas para impulsar a actividade cultural. Con este obxectivo se creou o primeiro Ciclo de Cine "Camposancos de Cine", que conta coa colaboración do Concello da Guarda e que dará comezo este sábado día 3 de setembro.

A través desta iniciativa se estrearán 3 películas en tres datas ao longo do mes de setembro. Os filmes forman un ciclo de cinema feito por directores, actores e veciños do pobo e da comarca relacionados co mundo audiovisual.

Na primeira das datas, este sábado 3 de setembro, proxectarase ó aire libre, na Praza de San Amaro ás 21:30 horas, a curta de Nani Matos Lurna.

A segunda cita deste primeiro Ciclo de Cine terá lugar o 10 de setembro. Nesta ocasión todos aqueles que acudan asistirán á estrea mundial do documental de Estefanía Alonso 15 pesetas por Frete no Casino de Camposancos ás 21 horas.

Para rematar o ciclo, o sábado 17 de setembro proxectarase na Casa de Montes de Camposancos, ás 21 horas, a curtametraxe Jaenette, de Xurxo Chirro.