-Fillos do sol- chega á Guarda o sábado coa súa versión dos últimos anos de Eduardo Pondal

En escena, o xa octoxenario bardo galego afrontará o seu último traballo comesto pola neurose, os medos e as insatisfaccións creativas e acompañado por un personaxe nacido da súa propia imaxinación: un mozo Eduardo nos seus inicios como poeta.

O elenco de actores está formado por César Cambeiro no papel de Pondal vello, Adrián Ríos como Pondal novo e Alba Bermúdez no papel de Rosa, a serventa da pensión. Todos eles manteñen unha relación divertida e emotiva ó mesmo tempo, na que se abordan temáticas como os perigos do perfeccionismo, os usos da lingua, a emigración e mesmo a emancipación feminina.

Escrita e dirixida por Cándido Pazó, a obra concíbese como unha homenaxe ao controvertido escritor no centésimo aniversario da súa morte. Pondal foi, xunto con Rosalía de Castro e Manuel Curros Enríquez, «un dos tres pés poéticos do Rexurdimento Galego», destacan dende a produtora.

As entradas para acceder ao espectáculo poderán recollerse de balde dende o 5 de maio, no Centro Cultural no seu horario de habitual de apertura (de 10 a 13 h de luns a venres e de 10 a 13 h os sábados).