A CNT consegue que o Concello da Guarda recoñeza os trienios das súas traballadoras

As traballadoras do servizo de axuda a domicilio a persoas dependentes contratadas polo Concello da Guarda levan máis de vinte anos no seu posto de traballo, pero en materia salarial era como se levaran a metade. Tras revisar as nóminas das traballadoras o Gabinete sindical da CNT Galiza (Confederación Nacional do Traballo) detectou que, a pesares de levar contratadas desde o ano 2000, o complemento en concepto de trienios a penas existía.

As traballadoras remitiron as súas queixas pola situación ao Concello e ás persoas responsables, pero foron ignoradas e non obtiveron ningunha resposta satisfactoria ata o día previo ao xuízo, data na que o Concello fixo caso ás reclamacións da CNT e recoñeceu os trienios que lle correspodían ás dúas traballadoras do municipio.

Tras a interposición da demanda e a falta de horas para a celebración do xuízo, a alcaldía resolveu que as peticións realizadas eran demasiado obvias como para pasar por un proceso xudicial e acordou pagar as cantidades atrasadas con intereses e recoñecer o dereito aos trienios correctos.

Dende o sindicato animan a todos e todas as traballadoras a formarse, e informarse en materia sindical e a revisar as súas nóminas e no seu caso denunciar os abusos. Estas traballadoras, ademais de recibir o atrasado con intereses pasan a aumentar o seu salario en 30 euros mensuais. "Estamos detectando multitude de "erros" sempre a favor das empresas e administracións públicas" indican dende a CNT.