A CONSELLERÍA DE EDUCACIÓN NON ATENDE AOS CENTROS DE ENSINO DA GUARDA

As actuacións que necesitan os centros e que os técnicos da Consellería asumen que se deben realizar foron solicitadas en repetidas ocasións e están avaladas por informes do aparellador municipal e propio persoal da Consellería. Incluso, na maioría dos casos, o propio Xefe Provincial considerou a necesidade da execución das obras e adquiriu o compromiso de realizalas.

As principais actuacións que se demandaron da Consellería teñen que ver coa seguridade nos centros de ensino, como no caso do colexio As Solanas, no que é necesaria a reparación da cuberta e unhas ventás do pavillón. Ou o cuberto do patio principal do colexio A Sangriña, que pode representar un perigo os días de vento polo desprendemento de elementos do tellado, como sucedeu o curso pasado. Neste caso existía un compromiso, por parte do Xefe Provincial, de incluír esta obra nos orzamentos do 2015. Compromiso que non se cumpriu.

O colexio Manuel Rodríguez Sinde leva esperando pola reparación do canalón do pavillón dende o curso pasado e aínda, a estas alturas do inverno, non se sabe nada. Os días de choiva, ao estar roto este canalón, a auga da cuberta do pavillón vai directamente a rampla de acceso ao colexio, facéndoa impracticable.

Son reparacións urxentes e necesarias. Non ten ningún sentido atrasalas. Estes problemas deberían estar resoltos antes de que empezara o duro do inverno. Agora son máis necesarias aínda e esperemos que non se produza ningún incidente por causa de non resolver a tempo estas deficiencias.

En repetidas ocasións o Xefe Provincial comprometeuse en realizar unha visita aos centros neste curso. Visita que sempre se pospuxo e que nunca se produciu.

O Concello da Guarda demanda, en coordinación cos consellos escolares, nos que está representada toda a comunidade educativa, unha solución a estes problemas.

Antonio Lomba Baz
Concelleiro de Educación do Concello da Guarda