A FUTURA BIBLIOTECA DE TOMIÑO PARTIRÁ DE PROPOSTAS VECIÑAIS CON ESPAZOS DIFERENCIADOS

Nesta primeira etapa, tamén estar a ser consultados algunhas asociacións culturais, de persoas con diversidade funcional e grupo de particulares, interesados en dar o seu punto de vista sobre qué tipo de biblioteca pública lles gustaría ter. O edificio, de dúas plantas, onde se construirá a nova instalación é a antiga casa médica de Tomiño, situada ao carón do Mercado Municipal.

Segundo explica a socióloga Susana Rodríguez, da consultora GRUPO ARESTORA, responsable do estudo, o obxectivo desta primeira rolda de conversacións é "xerar ideas e propostas que sirvan para elaborar un cuestionario que se pasará a todos os colectivos participantes para que confirmen e amplíen as súas preferenzas".

Asegura a experta, que a xente está participando no proceso cunha gran dose de ilusión, e que entre as inquedanzas compartidas pola maioría figuran a de dispor de espazos diferenciados para estudo, lectura, consulta, traballos de cooperación, informática, etc., así coma que a futura biblioteca sexa un referente de ocio creativo, punto de encontro social e familiar e, sobre todo, un lugar sen barreiras para a inclusión de persoas con discapacidades físicas ou intelectuais.

A segunda fase deste estudo cualitativo de investigación, que ten coma lema "Ideas que constrúen, sentando as bases da nosa biblioteca municipal", consistirá nunha nova rolda de encontros, da que sairán propostas de traballo máis específicas e criterios de actuación máis concretos.

Paralelamente, a consultora está levando a cabo accións de observación participante, é dicir, visitando bibliotecas consideradas modelo co fin de coñecer a súa forma de traballo, programación de actividades, distribución do espazo, etc.; e tomar nota dos aspectos positivos que se poidan incorporar ao proxecto da futura biblioteca municipal.

A concelleira de Cultura, Cristina Martínez, explicou pola súa banda, que "o que pretendemos é lograr ter unha biblioteca querida e pensada pola cidadanía; dinámica, moderna, creativa, eficiente, integradora; que responda ás necesidades dos diferentes perfís sociais".