A Guarda é un dos municipios cunha maior taxa de doazón de sangue de Galicia

No pasado ano, Galicia mantivo por décimo sétimo ano consecutivo a taxa de doazón de sangue recomendada pola Organización Mundial da Saúde (OMS), pese as dificultades que o envellecemento sociodemográfico supón para renovar a base de doadores.

Almuiña manifestou o compromiso do Executivo galego para continuar traballando arreo co obxectivo de achegar a doazón de sangue a todos os cidadáns e seguir ofrecer o mellor servizo aos doadores e aos receptores da súa solidariedade: os doentes dos hospitais.

Labor de visibilización
A directora da Axencia de Doazón de Órganos e Sangue (ADOS), Marisa López García, manifestou que o obxectivo da Axencia é ser unha canle, a conexión vital que posibilita que unhas persoas podan axudar ás outras, e avogou por visibilizar con esta xornada a importancia da colaboración dos cidadáns que desinteresadamente, cada día, fan unha doazón de sangue.

Tanto o conselleiro de Sanidade como a directora de ADOS manifestaron o seu agradecemento aos doadores e convidaron a todos os cidadáns e colectivos da sociedade galega a sumarse a espírito solidario e xeneroso que supón facer unha doazón de sangue.

Distincións
Os concellos que obtiveron o recoñecemento como os de maior taxa de doazón de Galicia foron Padrón, cun índice de 101 doazóns por cada 1.000 habitantes e ano; A Guarda, con 84/1000; os municipios ourensáns de Pobra de Trives e Xinzo de Limia con 61/1.000; e Lourenzá, que acadou 46/1.000.

Así mesmo, o Centro de Vigo do Grupo PSA, Inditex e Jealsa, recibiron a distinción na categoría de empresas e as facultades de Informática da Coruña, Medicina de Santiago e ETS de Enxeñaría de Telecomunicación de Vigo acadaron o recoñecemento por ser as de maior número de doazóns de sangue no eido universitario galego.

Pola súa banda, os centros de ensino non universitario distinguidos hoxe como os de máis participación durante o pasado ano 2016 foron o CIFP Ánxel Casal da Coruña, IES Muralla Romana de Lugo, o CIFP A Carballeira-Marcos Valcarcel de Ourense e o IES Politécnico de Vigo.

As forzas armadas tamén tiveron o seu recoñecemento coas distincións outorgadas á Escola de Especialidades Antonio de Escaño de Ferrol e á Base Militar General Morillo de Pontevedra.

Campaña especial
Representantes do mundo do deporte estiveron tamén presentes na entrega de distincións do Día Mundial do Doador de Sangue, xa que o RC Celta de Vigo e o RC Deportivo da Coruña recolleron o recoñecemento á campaña especial de doazón Imposible sen ti. Esta iniciativa tivo lugar o pasado ano e posibilitou que, nas xornadas previas ao derbi de máxima rivalidade autonómica na liga de honra do fútbol nacional, os dous equipos galegos unisen a súas forzas para promover o solidario xesto da doazón de sangue entre os seus seareiros.

Por último, Jesús Vidal Blanco e Blanca Ruzo foron recoñecidos como voluntarios especialmente implicados no transcurso das últimas décadas, e os doadores Javier Torres Penas, José Carlos Hernández Peleteiro e María Romero Figueiras, recibiron os seus recoñecementos polo seu salientable compromiso cos distintos tipos de doazón, simbolizando en eles a figura de todas as persoas que doan sangue en Galicia.